SHALOM METAL SUPPLY LTD v. COPCOM

# SHALOM METAL SUPPLY LTD v. COPCOM

- Source: Amategeko - Section: Decisions (Judgements) - Date: 2025-04-17 - Case/document no.: RCOMAA 00103/2024/CA - Collection: Court of Appeal

## Text

## Page 1

SHALOM METAL SUPPLY LTD v. COPCOM [Rwanda URUKIKO RW’UBUJURIRE – RCOMAA 00103/2024/CA (Kamere, P.J.) 17 Mata 2025] Amategeko agenga ububasha bw’Inkiko – Ububasha bw’Urukiko rw’Ubujurire – Ubujurire bwa kabiri – Ubujurire bwa kabiri ntibwakirwa iyo umuburanyi uvuga ko inkiko zaciye urubanza haba ku rwego rwa mbere n’urwa kabiri zitari zifite ububasha, atabasha gusobanura ubwo bubasha inkiko zitari zifite hagati y’ububasha bushingiye ku kiburanwa (compétence matérielle) n’ububasha bushingiye ku ifasi (compétence territoriale). Incamake y’ikibazo: COPCOM yagiranye na SHALOM METAL SUPPLY Ltd amasezerano y’ubukode bwa hangari kugira ngo SHALOM METAL SUPPLY Ltd ihakorere ubucuruzi, batangira ayo masezerano atanditse ariko nyuma muri 2021 aza gushyirwa mu nyandiko, impande zombi zumvikana ko SHALOM METAL SUPPLY Ltd izajya yishyura amafaranga y’ubukode angana na 118.000 Frw buri kwezi, hanyuma byagera mu mwaka wa 2018 ikazajya yishyura amafaranga angana na 117.000 Frw buri kwezi. Ayo masezerano SHALOM METAL SUPPLY Ltd ntiyayubahirije, ntiyishyura umwenda ibereyemo COPCOM bituma COPCOM iyirega mu Rukiko rw’Ubucuruzi irusaba kuyitegeka kuyishyura umwenda ungana 14.968.500 Frw no kuyiha indishyi z’ikurikiranarubanza n’igihembo cya Avoka. Urukiko rw’Ubucuruzi rwaciye urubanza rwemeza ko ikirego cyatanzwe na COPCOM nta shingiro gifite, ko nta mwenda SHALOM METAL SUPPLY Ltd iyibereyemo, rutegeka COPCOM guha SHALOM METAL SUPPLY Ltd amafaranga y’ikurikiranarubanza n’a y’igihembo cya Avoka. COPCOM itishimiye icyo cyemezo yajuririye mu Rukiko Rukuru rw’Ubucuruzi ivuga ko SHALOM METAL SUPPLY Ltd ikwiye kuyishyura umwenda ungana na 13.766.500 Frw iyibereyemo, n’indishyi mbonezamusaruro z’uwo mwenda zibariwe kuri 18% ndetse isaba n’amafaranga y’ikurikiranarubanza n’igihembo cya Avoka. Urukiko Rukuru rw’Ubucuruzi rwaciye urubanza rwemeza ko SHALOM METAL SUPPLY Ltd igomba kwishyura COPCOM umwenda ungana na 13.766.500 Frw w’ubukode bwa hangari ndetse n’igihembo cya Avoka ndetse rwemeza ko imikirize y’urubanza rwaciwe n’Urukiko rw’Ubucuruzi ihindutse. SHALOM METAL SUPPLY Ltd yajuririye mu Rukiko rw’Ubujurire irusaba gusuzuma niba Inkiko z’Ubucuruzi zaragombaga kwakira ikirego cya COPCOM zikakiburanisha mu gihe COPCOM yagitanze itarabanje kubahiriza umuhango wo kwikiranura wari uteganyijwe mu masezerano impande zombi zagiranye, inarusaba gusuzuma niba hari umwenda ibereyemo COPCOM ndetse isoza isaba indishyi zinyuranye. Iburanisha ryabereye mu ruhame COPCOM itanga inzitizi y’iburabubasha bw’Urukiko rw’Ubujurire ku kwakira ubujurire bwa kabiri ikavuga ko nta mpamvu ihari iteganywa n’itegeko yatuma bwakirwa. Ku rundi ruhande SHALOM METAL SUPPLY Ltd kuri iyi nzitizi, ivuga ko impamvu ituma ubujurire bwa kabiri bugomba kwakirwa ari uko urubanza rujuririrwa rwaciwe n’inkiko zitari zibifitiye ububasha kuko ngo zitari kwemera kwakira ikirego cyatangijwe na COPCOM kandi hari

## Page 2

umuhango wo kwikiranura wari uteganyijwe mu masezerano impande zombi zagiranye utarabanje kubahirizwa. Incamake y’icyemezo: Ubujurire bwa kabiri ntibwakirwa iyo umuburanyi uvuga ko inkiko zaciye urubanza haba ku rwego rwa mbere n’urwa kabiri zitari zifite ububasha, atabasha gusobanura ubwo bubasha inkiko zitari zifite hagati y’ububasha bushingiye ku kiburanwa (compétence matérielle) n’ububasha bushingiye ku ifasi (compétence territoriale). Ubujurire bwa kabiri ntibwakiriwe. Amagarama ahwanye n’ibyakozwe mu rubanza. Amategeko yashingiweho: Itegeko N°30/2018 ryo ku wa 02/06/2018 rigena ububasha bw’Inkiko, Ingingo ya 52, igika cya 2, 3o. Nta manza zifashishijwe

Urubanza I. IMITERERE Y′URUBANZA COPCOM yagiranye na SHALOM METAL SUPPLY Ltd amasezerano y’ubukode bwa hangari kugira ngo SHALOM METAL SUPPLY Ltd ihakorere ubucuruzi, ayo masezerano akaba yaratangiye mu mwaka wa 2016 atanditse, bigeze ku wa 18/08/2021 impande zombi zigirana amasezerano yanditse. COPCOM ivuga ko muri ayo masezerano impande zombi zumvikanye ko SHALOM METAL SUPPLY Ltd izajya yishyura amafaranga y’ubukode angana na 118.000 Frw buri kwezi, hanyuma byagera mu mwaka wa 2018 ikazajya yishyura amafaranga angana na 117.000 Frw buri kwezi, ariko ko SHALOM METAL SUPPLY Ltd itigeze yishyura ubukode uko bikwiye, bituma COPCOM irega SHALOM METAL SUPPLY Ltd mu Rukiko rw’Ubucuruzi irusaba kuyitegeka kuyishyura umwenda iyibereyemo ungana na 14.968.500 Frw no kuyiha indishyi z’ikurikiranarubanza n’igihembo cya Avoka. [1] SHALOM METAL SUPPLY Ltd yireguye ivuga ko nta mwenda w’ubukode ibereyemo COPCOM, ko ahubwo COPCOM ari yo iyibereyemo umwenda, ngo kuko ubwo amasezerano yo ku wa 18/08/2021 yakorwaga yishyuye COPCOM mbere, kuko mbere y’iyo tariki yishyuraga ari uko yakoze, yaba itakoze ntiyishyure, kandi ko yishyuraga mu ntoki. [2] Ku wa 26/10/2023, Urukiko rw’Ubucuruzi rwaciye urubanza RCOM 01517/2022/TC, rwemeza ko ikirego cyatanzwe na COPCOM nta shingiro gifite, ko nta mwenda SHALOM METAL SUPPLY Ltd iyibereyemo, rutegeka COPCOM guha SHALOM METAL SUPPLY Ltd 200.000 Frw y’ikurikiranarubanza na 500.000 Frw y’igihembo cya Avoka. [3] COPCOM ntiyishimiye icyo cyemezo, ikijuririra mu Rukiko Rukuru rw’Ubucuruzi, ivuga ko SHALOM METAL SUPPLY Ltd ikwiye kwishyura umwenda ungana na 13.766.500 Frw

## Page 3

iyibereyemo, n’indishyi mbonezamusaruro z’uwo mwenda zibariwe kuri 18%. Isoza isaba amafaranga y’ikurikiranarubanza n’igihembo cya Avoka. [4] SHALOM METAL SUPPLY Ltd yireguye kuri ubwo bujurire ivuga ko nta shingiro bufite, ngo kuko nta mwenda ibereyemo COPCOM, ko COPCOM mu rukiko rubanza itashoboye kwerekana umwenda yishyuza cyane cyane ko igenda iwuhindagura, ko hari ubwishyu yagiye yishyura COPCOM mu ntoki ikabwakira, ari na yo mpamvu mu gihe cyo gusesa amasezerano mu ibaruwa yo ku wa 19/05/2022 nta mwenda wigeze ugaragazwa, ahubwo ko umwenda wavutse mu rwego rwo kwihimura nyuma y’uko hatangijwe imanza COPCOM iregwamo gusesa amasezerano mu buryo bunyuranye n’amategeko. Mu gusoza na yo yasabye amafaranga y’ikurikiranarubanza n’igihembo cya Avoka. [5] Ku wa 14/11/2024, Urukiko Rukuru rw’Ubucuruzi rwaciye urubanza RCOMA 00612/2023/HCC, rwemeza ko ubujurire bwa COPCOM bufite ishingiro, ko SHALOM METAL SUPPLY Ltd igomba kwishyura COPCOM umwenda ungana na 13.766.500 Frw w’ubukode bwa hangari, 800.000 Frw y’igihembo cya Avoka cyo ku rwego rwa mbere no mu bujurire kandi ko imikirize y’urubanza RCOM 01517/2022/TC rwaciwe n’Urukiko rw’Ubucuruzi ku wa 26/10/2023 ihindutse. [6] SHALOM METAL SUPPLY Ltd ntiyishimiye iyo mikirize y’urubanza, ku wa 13/12/2024 irujuririra mu Rukiko rw’Ubujurire, ubujurire bwayo bwandikwa kuri RCOMAA 00103/2024/CA, irusaba gusuzuma niba Inkiko z’Ubucuruzi zaragombaga kwakira ikirego cya COPCOM zikakiburanisha mu gihe COPCOM yagitanze itarabanje kubahiriza umuhango wo kwikiranura wari uteganyijwe mu masezerano impande zombi zagiranye. SHALOM METAL SUPPLY Ltd isaba kandi Urukiko rw’Ubujurire gusuzuma niba Urukiko Rukuru rw’Ubucuruzi rwaragombaga kwemeza ko hari umwenda ibereyemo COPCOM no gusuzuma niba hari amafaranga y’ikurikiranarubanza n’igihembo cya Avoka yagombaga gutegekwa kuyishyura. Isoza isaba indishyi zinyuranye. [7] Iburanisha ry’urubanza ryashyizwe ku wa 02/04/2025, ruburanishwa ababuranyi bombi bahari, SHALOM METAL SUPPLY Ltd ihagarariwe na Me Mutangana Jean Bosco na Me Rusagara Innocent, naho COPCOM ihagarariwe na Me Murekatete Henriette. Mw’iburanisha Urukiko rwumvise ibisobanuro by’ababuranyi ku ngingo irebana n’inzitizi y’iburabubasha bw’Urukiko rw’Ubujurire yatanzwe na COPCOM uyiburanira avuga ko nta mpamvu ihari iteganywa n’itegeko yatuma ubujurire bwa kabiri bwa SHALOM METAL SUPPLY Ltd bwakirwa, naho ababuranira SHALOM METAL SUPPLY Ltd bakavuga ko impamvu bashingiraho ituma bugomba kwakirwa ari uko urubanza rujuririrwa rwaciwe n’inkiko zitari zibifitiye ububasha kuko ngo zitari kwemera kwakira ikirego cyatangijwe na COPCOM kandi hari umuhango wo kwikiranura wari uteganyijwe mu masezerano impande zombi zagiranye utarabanje kubahirizwa. Urukiko rwanumvise ababuranyi ku birebana n’amafaranga y’ikurikiranarubanza n’igihembo cya Avoka asabwa n’uregwa, mu gihe inzitizi yatanze yaba ihawe ishingiro urubanza rukarangirira aha. Isomwa ry’urubanza ryashyizwe ku wa 17/04/2025. II. IBIBAZO BIGIZE URU RUBANZA N’ISESENGURA RYABYO

## Page 4

Gusuzuma niba ubujurire bwa kabiri bwatanzwe na SHALOM METAL SUPPLY Ltd buri mu bubasha bw’Urukiko rw’Ubujurire [8] Me Murekatete Henriette uhagarariye COPCOM ashingiye ku ngingo ya 52 igika cya 2 agace ka 8º y’Itegeko N°30/2018 ryo ku wa 02/06/2018, rigena ububasha bw’Inkiko1, atanga inzitizi y’iburabubasha bw’Urukiko rw’Ubujurire, ishingiye ku kuba ikiburanwa kitagejeje kuri 75.000.000 Frw, kubera ko umwenda uregerwa ndetse n'indishyi Urukiko rwategetse ko yishyura bitagejeje kuri aya mafaranga no ku kuba nta muhango n'umwe utarakozwe mu rubanza rujuririrwa. Ashingira no ku rugero rw’urubanza RCAA 00025/2019/CA rw’Akarere ka Kirehe na SANLAM Assurances Générales Plc rwaciwe ku wa 24/07/2020 aho Urukiko rwanze kwakira ikirego cy’ubujurire bwa kabiri kubera agaciro k’ikiburanwa katageze ku gasabwa n’itegeko. [9] Me Murekatete Henriette uhagarariye COPCOM avuga ko ibyo Shalom Metal Supply Ltd ivuga ko Inkiko zabanje zaciye urubanza nta bubasha zari zifite ngo kuko impande zombi zitabanje gukemura ikibazo zari zifitanye binyuze mu nzira y’ubwumvikane nta shingiro byahabwa, kuko iyo mpamvu yo kutumvikana hakurikijwe amaseserano bagiranye itareberwamo incompétence (iburabubasha), ahubwo ko iyo haba hari procedure batubahirije mbere yo kurega ikirego kiba irrecevable (nticyakirwa) mbere y’uko urega avanza kubahiriza iyo mihango ya procedure. [10] Abahagarariye SHALOM METAL SUPPLY Ltd biregura kuri iyi nzitizi basaba ko idahabwa ishingiro, ko ku birebana n’ubujurire bwa kabiri bwatanzwe muri uru Rukiko na SHALOM METAL SUPPLY Ltd ububasha bw’Urukiko rw’Ubujurire budakwiye kureberwa mu gaciro k’ikiburanwa cyangwa se ingano y’indishyi zagenwe, ko ahubwo bukwiye kureberwa mu masezerano impande zombi zagiranye, aho zumvikanye ko mbere yo kugana inkiko zizabanza kwikiranura, bityo ngo Urukiko rw’Ubujurire rufite ububasha bwo kuburanisha ubujurire bwa SHALOM METAL SUPPLY Ltd, hashingiwe ku biteganywa n’ingingo ya 52, igika cya 3 y’Itegeko n°30/2018 ryo ku wa 02/06/2018 rigena ububasha bw’Inkiko, kuko ngo Urukiko rwaciye urubanza rujuririrwa nta bubasha rwari rubifitiye, kuko hatubahirijwe umuhango wo kwikiranura wari warateganyijwe mu masezerano y’ubukode bwa hangari yo ku wa 18/08/2021 impande zombi zagiranye, aho ingingo yayo ya 5 yateganyaga ko mbere yo kuregera inkiko zibifitiye ububasha impande zigiranye amasezerano zizabanza kwikiranura. [11] Ababuranira SHALOM METAL SUPPLY Ltd basobanura kandi ko iki kibazo cyo kuba hatarabanje kubahirizwa umuhango wo kwikiranura mbere y’uko COPCOM itangiza ikirego mu Rukiko rw’Ubucuruzi, cyatanzwe nk’inzitizi yo kutakira ikirego cya COPCOM kuva uru rubanza rwatangira, nk’uko bigaragara mu gika cya 3 cy’urubanza RCOM 01517/2022/TC ndetse no ku rwego rw’ubujurire, ariko inkiko zombi zabanje zibirengaho ziraburanisha. Bityo bakabona ko inkiko zabanje nta bubasha bwo kuburanisha uru rubanza zari zifite hashingiwe ku biteganywa n’ingingo ya 5 y’amasezerano yo ku wa 18/08/2021 arebana n’ubukode bwa hangari nº 78 na nº 79 cyane cyane ku bijyanye no kwikiranura igihe havutse ikibazo, aho impande zombi zemeranyijwe ko impaka zose zivutse kuri aya masezerano zizakemurwa mu bwumvikane bwazo, izo mpaka zitarangira hakiyambazwa Inkiko zibifitiye ububasha.

1 Iyo ngingo ya 52 iteganya ibi bikurikira: ʺUrukiko rw’Ubujurire rufite kandi ububasha bwo kuburanisha mu rwego rw’ubujurire bwa kabiri imanza zaciwe n’Urukiko Rukuru, Urukiko Rukuru rw’Ubucuruzi n’Urukiko Rukuru rwa Gisirikare, iyo izo manza: (…) 8° zagenwemo n’urukiko indishyi zingana nibura na 75.000.000 Frw cyangwa zifite agaciro kagenwe n’umucamanza mu gihe habaye impaka kangana na 75.000.000 Frw”.

## Page 5

[12] Ababuranira SHALOM METAL SUPPLY Ltd basaba Urukiko rw’Ubujurire gutesha agaciro urubanza RCOMA 00612/2023/HCC rujuririrwa kimwe n’urwarubanjirije, ngo kuko zaciwe n’inkiko zitabifitiye ububasha, no gutanga umurongo w’uko iyo impande zombi zateganyije inzira yo kwikiranura mu masezerano nta ruhande ruba rukwiye gusimbuka iyo nzira ngo rugane inzira y’Inkiko, mu gihe impande zombi zitananiwe kumvikana, ariko ko iki kibazo cyashyikirijwe Urukiko Rukuru rw’Ubucuruzi rukacyirengagiza nkana; bityo asaba Urukiko rw’Ubujurire ngo ruzemeze ko rufite ububasha bwo kuburanisha ubujurire bwa kabiri bwa SHALOM METAL SUPPLY Ltd hashingiwe ku biteganywa n’ingingo ya 52, igika cya 3 y’Itegeko N°30/2018 ryo ku wa 02/06/2018 rigena ububasha bw’Inkiko. UKO URUKIKO RUBIBONA [13] Ikibazo Urukiko rusuzuma aha ni ukumenya niba ukutabaho ko kubanza kugerageza ubwumvikane hagati y’ababuranyi bombi, kandi uko kugerageza ubwumvikane mbere yo kwiyambaza inkiko ari umuhango wateganyijwe mu masezerano bagiranye, ndetse aho COPCOM iregeye inkiko z’ubucuruzi bikazamurwa n’uregwa nk’inzitizi yo kutakira icyo kirego ariko ntihabwe ishingiro, ubu byabera SHALOM METAL SUPPLY Ltd impamvu yemewe n’amategeko yatuma ubujurire bwayo bwa kabiri bwakirwa nk’uburi mu bubasha bw’uru Rukiko, ngo kuko byaba bivuze ko inkiko zabanje zaciye urubanza zitari zifitiye ububasha bwo kuburanisha. [14] Mu gusaba ko ubujurire bwayo bwa kabiri bwakirwa nk’uburi mu bubasha bw’uru Rukiko, ababuranira SHALOM METAL SUPPLY Ltd bavuga ko bashingira ku ngingo ya 52, igika cya 2, 3o y’Itegeko N°30/2018 ryo ku wa 02/06/2018 rigena ububasha bw’Inkiko iteganya ibi bikurikira: “Urukiko rw’Ubujurire rufite kandi ububasha bwo kuburanisha mu rwego rw’ubujurire bwa kabiri imanza zaciwe n’Urukiko Rukuru, Urukiko Rukuru rw’Ubucuruzi n’Urukiko Rukuru rwa Gisirikare, iyo izo manza … zaciwe n’urukiko rutabifitiye ububasha”. [15] Bisanzwe bizwi neza mu buryo butagibwaho impaka ko ububasha bw’inkiko buri ukubiri: ububasha bushingiye ku kiburanwa (compétence matérielle) n’ububasha bushingiye ku ifasi (compétence territoriale). Ibi bikaba bivuze ko mu gihe SHALOM METAL SUPPLY Ltd ivuga ko Urukiko Rukuru rw’Ubucuruzi rwaciye urubanza rutabifitiye ububasha kuko n’Urukiko rw’Ubucuruzi rwaruciye ku rwego rwa mbere rutari rufite ububasha, iba igomba no gushobora gusobanura ubwo bubasha inkiko zitari zifite hagati y’ububasha bushingiye ku kiburanwa (compétence matérielle) n’ububasha bushingiye ku ifasi (compétence territoriale) bumaze kuvugwa haruguru. [16] Dosiye y’urubanza igaragaza ko mu rukiko rw’ubucuruzi mu iburanisha ryo ku wa 19/06/2023, uwari uhagarariye shalom metal supply ltd icyo gihe yaregwaga n’abamwunganira batanze inzitizi yo kutakira ikirego (fin de non-recevoir) cyatanzwe na copcom basobanura ko hari imihango itarubahirijwe, aho ikibazo cyaregewe cyagombaga kubanza gukemurwa mu bwumvikane hagati y’impande zombi, ubwumvikane bwananirana kigashyikirizwa ikigo cy’igihugu cy’amakoperative (rca), byananirana kikabona gushyikirizwa urukiko. ababuranira shalom metal supply ltd ariko ntibavuga ko urukiko ikirego cyari gushyikirizwa nyuma yo kunanirwa kumvikana rwaba ari urundi rutandukanye n’urukiko rw’ubucuruzi rwaregewe. Mu kwiregura kuri iyi nzitizi uhagarariye copcom yavuze ko ubwumvikane bwananiranye mu buryo

## Page 6

bwose bwageragejwemo, maze mu gufata icyemezo urukiko rw’ubucuruzi rwemeza ko inzitizi itangwa na shalom metal suply ltd nta shingiro ifite, iburanisha rikomeza mu mizi y’urubanza. [17] Dosiye y’urubanza igaragaza ko mu Rukiko Rukuru rw’Ubucuruzi COPCOM yajuririye urubanza rwavuzwe haruguru ku birebana n’icyemezo cyafashwe mu mizi cyo kudaha ishingiro ibyo yari yaregeye, ubujurire bukandikwa kuri RCOMA 00612/2023/HCC, ivuga ko SHALOM METAL SUPPLY Ltd ikwiye kwishyura umwenda ungana na 13.766.500 Frw ibereyemo COPCOM n’indishyi mbonezamusaruro z’uwo mwenda, zibariwe kuri 18%, naho SHALOM METAL SUPPLY Ltd yo igaragaza ko ubujurire bwa COPCOM butagomba guhabwa ishingiro, ababuranyi bombi bagasabamo amafaranga y’ikurikiranarubanza n’igihembo cya Avoka; ibi bikaba ari byo gusa byasuzumwe kuri urwo rwego rw’ubujurire, hakaba nta kibazo cy’inzitizi yo kutakira ikirego cyangwa se iy’iburabubasha bw’Urukiko byigeze bisuzumwa kuri urwo rwego. [18] Urukiko rw’Ubujurire rusesenguye imiburanire ya SHALOM METAL SUPPLY Ltd muri izo nkiko zabanje ku kibazo cy’inzitizi ivuga ko yatanzemo, ruyihuje n’ibiteganywa n’agace ka 3o k’ingingo ya 52, igika cya 2 y’Itegeko rigena ububasha bw’inkiko yibukijwe haruguru, rurasanga nta nzitizi y’iburabubasha bw’Urukiko SHALOM METAL SUPPLY Ltd (exception d’incompétence) yigeze itanga haba ku rwego rwa mbere, haba no ku rwego rw’ubujurire bwa mbere, ahubwo inzitizi yatanze ku rwego rwa mbere yari iyo kutakira ikirego (fin de non-recevoir) kandi nayo itarahawe ishingiro. [19] Urukiko rurasanga nta burabubasha bw’Urukiko Rukuru rw’Ubucuruzi riri mu kuba rwaraciye urubanza SHALOM METAL SUPPLY Ltd ijuririra bwa kabiri, bwatuma iregera Urukiko rw’Ubujurire ku bujurire bwa kabiri bw’Urubanza RCOMA 00612/2023/HCC rwaciwe n’Urukiko Rukuru rw’Ubucuruzi ku wa 14/11/2024. Ibyo SHALOM METAL SUPPLY Ltd ivuga ku nzitizi yigeze gutanga ku rwego rwa mbere bikaba bihabanye n’ibyaburanishijwe mu manza RCAA 00022/2016/SC-RCAA 0022/16/CS na RCAA 00026/2018/CA itangaho icyitegererezo, kuko zo zaburanishije ku nzitizi z’iburabubasha bw’Urukiko Rwisumbuye ku manza zateganyirijwe ko ziburanishwa n’Urukiko rw’Ibanze n’umuhango uteganyirizwa kubanza gukorwa mbere yo kwakira ikirego mu Rukiko2. [20] Hashingiwe ku bimaze gusobanurwa haruguru, Urukiko rurasanga inzitizi y'iburabubasha bw'Urukiko rw'Ubujurire ku bujurire bwa kabiri bwatanzwe na SHALOM METAL SUPPLY Ltd,

2 Urukiko rubona ko n’ubwo inyandiko itanga ikirego mu Rukiko Rwisumbuye igaragaza ko haregewe gutesha agaciro amasezerano y’ubukode burambye yahawe MBARUSHIMANA Jean Pierre utari nyir’umutungo, Urukiko rusanga rero, kuba ikiregerwa ari isambu, ikirego cyaragombaga gutangwa mu Rukiko rw’Ibanze hashingiwe ku biteganywa n’ingingo ya 67 y’Itegeko Ngenga nº 51/2008 ryo ku wa 09/09/2008 rigena imiterere, imikorere n‟ububasha bw‟inkiko ryakurikizwaga ubwo cyatangwaga [Reba igika cya 12 & 14 by’urwo rubanza].

Urukiko rusanga kuba KALIMBA Jean Claude na bagenzi be barahise baregera Urukiko Rwisumbuye rwa Nyarugenge ikibazo kirebana n'izungura ry'umutungo wasizwe na KALIMBA Ferdinand batabanje kugishyikiriza inama y'umuryango we kugira ngo igisuzume, ari impamvu yagombaga gutuma icyo kirego kitakirwa kuko cyatanzwe mu buryo budakurikije amategeko, bityo n'imanza zaciwe mbere zikaba zigomba kuvanamwaho nk'uko biteganywa n'ingingo ya 158, igika cya mbere, y'ltegeko n o 22/2018 ryo ku wa 29/04/2018 ryerekeye imiburanishirize y'imanza z'imbonezamubano, iz'ubucuruzi, iz'umurimo n'iz'ubutegetsi [Reba igika cya 30 cy’urwo rubanza].

## Page 7

ifite ishingiro kuko icyo yashingiye ijurira nta na kimwe bihuye nacyo mu biteganywa n’ingingo ya 52 y’Itegeko N°30/2018 ryo ku wa 02/06/2018 rigena ububasha bw’Inkiko kugira ngo ubujurire bwa kabiri bube buri mu bubasha bw’uru Rukiko. Ibyerekeye amafaranga y’ikurikiranarubanza n’igihembo cya Avoka asabwa na COPCOM [21] Me Murekatete Henriette uhagarariye COPCOM ashingiye ku ngingo ya 111 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, no ku ngingo ya 26 y’Amabwiriza mbonera agena ibihembo by’Abavoka, asaba Urukiko rw’Ubujurire gutegeka SHALOM METAL SUPLY Ltd guha COPCOM amafaranga 500.000 Frw y’ikurikiranarubanza n’igihembo cya Avoka angana na 1.000.000Frw, yose hamwe akaba 1.500.000 Frw, yiyongera ku yatanzwe mu rubanza RCOMA 00612/2023/HCC rujuririrwa, kubera ko ari yo yabaye nyirabayazana w’urubanza rudafite ishingiro. [22] Abahagarariye SHALOM METAL SUPPLY Ltd yireguye kuri aya mafaranga y’ikurikiranarubanza n’igihembo cya Avoka COPCOM isaba, bavuga ko nta shingiro akwiye guhabwa, ngo kuko COPCOM ari yo yabaye nyirabayazana w'imanza zidafite ishingiro. Bityo ko niba ibikorwa byayo byarayitwaye amafaranga ntawe ikwiye kubiryoza ahubwo ari yo ikwiye kubyirengera.

UKO URUKIKO RUBIBONA [23] Ingingo ya 111 y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ibikurikira: ʺIkirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. [24] Hakurikijwe ibiteganywa n’iyi ngingo y’Itegeko imaze kuvugwa hejuru, Urukiko rw’Ubujurire rurasanga amafaranga y’igihembo cya Avoka n’ay’ikurikiranarubanza COPCOM isaba kuri uru rwego, afite ishingiro kuko byumvikana ko yashatse Avoka wo kuyiburanira no gukurikirana urubanza. Mu bushishozi bw’Urukiko rukaba rugomba kugenera COPCOM amafaranga ibihumbi magana arindwi (700.000 Frw) akubiyemo 500.000 Frw y’igihembo cya Avoka na 200.000 Frw y’ikurikiranarubanza kuri uru rwego. III. ICYEMEZO CY’URUKIKO [25] Rwemeje ko ubujurire bwa kabiri bwatanzwe na SHALOM METAL SUPPLY Ltd butakiriwe, kuko butari mu bubasha bw’Urukiko rw’Ubujurire. [26] Rutegetse SHALOM METAL SUPPLY Ltd kwishyura COPCOM amafaranga ibihumbi magana arindwi (700.000 Frw) akubiyemo 500.000 Frw y’igihembo cya Avoka na 200.000 Frw y’ikurikiranarubanza kuri uru rwego.

## Page 8

[27] Ruvuze ko amafaranga y’ingwate y’amagarama SHALOM METAL SUPPLY Ltd yatanze ijurira ahwanye n’ibyakozwe muri uru rubanza.