SONARWA GI COMPANY LTD v NKURUNZIZA N’ABANDI

SONARWA GI COMPANY LTD v NKURUNZIZA N’ABANDI

- Source: Amategeko - Section: Decisions (Judgements) - Date: 2023-06-27 - Case/document no.: RCA00006/2023/HC/MUS - Collection: High Court

Text

Page 1

SONARWA GI COMPANY LTD v NKURUNZIZA N’ABANDI [Rwanda URUKIKO RUKURU URUGEREKO RWA MUSANZE – RCA00006/2023/HC/MUS (Mukamuhire, P.J.) 27 Kamena 2023] Amategeko mbonezamuano – Indishyi zikomoka ku mpanuka – Impanuka zitewe n’ibinyabiziga – indishyi mbangamirabukungu – Itegeko Urukiko rushingirago rugena Indishyi mbangamirabukungu – Mu kugena indishyi mbangamirabukungu zikwiye Urukiko rushingira ku Itegeko rishyiraho uburyo bwo kwishyura indishyi ku bubabare bw’umubiri buturutse ku mpanuka zitewe n’ibinyabiziga. Amategeko agenga imanza mbonezamubano – Ubwishingizi – Impanuka Indishyi mbangamirabukungu – Indishyi mbangamirabukungu zisabwa n’ufitanye isano na nyakwigendera – usaba indishyi mbangamirabukungu ufitanye isano na nyakwigendera agomba kuba yarasanzwe atunzwe na nyakwigendera – Ntabwo bihagije ko umuntu agaragaza ko afitanye isano gusa na nyakwigendera kugirango asabe kandi ahabwe n’Urukiko Indishyi mbangamirabukungu Incamake y’ikibazo: Uru rubanza rwatangiye Ababyeyi n’abavandimwe ba Ahishakiye bahagarariwe na Nkurunziza barega Sonarwa Gi Company Ltd mu Rukiko rwisumbuye rwa Musanze basaba indishyi zitandukanye kubera impanuka y'imodoka Lorry M/BENZ KCE 415X trailer ZF 2095 ifite ubwishingizi bwa COMESA yabereye mu murenge wa Gacaca akarere ka Musanze Kuwa 02/02/2021igahitana Ahishakiye. Abarega bavuga ko basabye indishyi Sonarwa ku bwumvikane, birananirana. Urukiko mu

rubanza RC00074/2021/TGI/MUS rwemeje ko ikirego cya Nkurunziza na bagenzi be gifite ishingiro rubagenera indishyi zitandukaye, zose hamwe zingana 12,939,450Frw. Sonarwa Gi Company Ltd ntiyishimiye imikirize yurwo rubanza irujuririra mu Rukiko Rukuru Urugereko rwa Musanze, uhagarariye Sonarwa Gi Company avuga ko mu rubanza rujuririrwa Urukiko rwashingiye ku ngingo ya 255 y’itegeko No 32/2016 ryo kuwa 28/08/2016 rigenga abantu n’umuryango kandi ngo rwaragombaga gushingira ku ngingo 22 y’ Iteka rya Perezida riteganya ibyerekeye indishyi zikomoka ku mpanuka z’ibinyabiziga. Bityo ngo rukaba rwarashingiye ku ngingo itariyo. Avuga kandi ko ababyeyi n’abavandimwe ba nyakwigendera batashoboye kugaragariza Urukiko ko ari we wari ubatunze umunsi ku wundi, bityo ko indishyi mbangamirabukungu ntazo bari guhabwa. Uhagarariye abaregwa mu bujurire yireguye avuga ko indishyi mbangamirabukungu zagombaga kugenerwa ababyeyi be kuko babuze umwana wabo kandi wari ufite icyo abamariye, avuga ko Ahishakiye yari umusore ufite imyaka 21 ubana n’ababyeyi be kandi batifashije, bityo ngo, nk’umwana w’umusore yari afite inshingano zo kwita ku babyeyi be kuko bari bakuze kandi batishoboye. Incamake y’icyemezo:1.Ntabwo indishyi mbangamirabukungu zatangwa hashingiwe ku Itegeko rigenga abantu n’umuryango kandi hari Itegeko ryihariye rishyiraho uburyo bwo kwishyura indishyi ku bubabare bw’umubiri buturutse ku mpanuka zitewe n’ibinyabiziga. Bityo,

Page 2

Urukiko ruciye urubanza rushingiye ku Itegeko rigenga abantu n’umuryango ku kibazo nkiki ruba rushingiye ku Itegeko ritari ryo. 2.Ntabwo bihagije ko umuntu agaragaza ko afitanye isano gusa na nyakwigendera kugirango asabe kandi ahabwe n’Urukiko Indishyi mbangamirabukungu. Bityo, usaba izi ndishyi agomba gutanga ibimenyetso bigaragaza ko yaratunzwe na nyakwigendera. Ubujurire bufite ishingiro kuri bimwe. Amategeko yashingiweho: Itegeko No 22/2018 ryo kuwa 29/04/2018 ryerekeyeimiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 111 Itegeko rya Perezida N° 31/01 ryo kuwa 25/08/2003 rishyiraho uburyo bwo kwishyura indishyi ku bubabare bw’umubiri buturutse ku mpanuka zitewe n’ibinyabiziga, Ingingo ya 22 Itegeko N°41/2001 ryo ku wa 19/09/2001 ryerekeye itangwa ry'indishyi ku bahohotewe biturutse ku mpanuka zo ku mubiri zitewe n'ibinyabiziga, Ingingo ya 4 Amabwiriza N° 01/2014 agena ibihembo mbonera by’abavoka, Ingingo ya 34 Imanza zifashishijwe: Urubanza RS/INJUST/RC00021/2022/SC,Mukagatare Regine na SANLAM AG Plc, igika cya 36 rwaciwe n’Urukiko rw’Ikirenga kuwa 17/03/2023 Urubanza RCAA 0049/14/CS, SORAS AG LTD na Umuhoza Pacifique, Izabayo Sylvie na Niyoyita Jacques, rwaciwe n’Urukiko rw’Ikirenga kuwa 25/11/2016. Urubanza I.IMITERERE Y’ URUBANZA [1] Kuwa 02/02/2021, mu mudugudu wa Gahama, akagari ka Gakoro, Umurenge wa Gacaca, akarere ka

Musanze, habaye impanuka y'imodoka Lorry M/BENZ KCE 415X trailer ZF 2095 ifite ubwishingizi bwa COMESA yari itwawe na Mutunga Wambua, ageze aho twavuze agonga umunyegare witwa Ahishakiye Damascene ahita apfa. Ababyeyi n’abavandimwe ba nyakwigendera begereye SONARWA bayisaba indishyi ku bwumvikane, ubwumvikane ntibwakunze bituma baregera urukiko. [2] Urukiko rwisumbuye rwa Musanze rwaregewe ku rwego rwa mbere rwemeje ko ikirego cya Nkurunziza Silas na bagenzi be gifite ishingiro, rubagenera indishyi zibazwe mu buryo bukurikira: Indishyi mbangamiramuco: Ababyeyi ba nyakwigendera bagenerwa :3000x30x12x0,75x2= 1,620,000frw;

Page 3

Abavandimwe

ba

nyakwigendera

uko

ari

batandatu(6): 3000x12x30x0,5=3,240,000frw ; [3] Andi mafaranga yaguzwe inyandikomvugo y’impanuka 9.600frw , Amafaranga yaguzwe ibyangombwa byo mu buyobozi 21.600Frw, Amafaranga yaguzwe isanduku 80.000frw , Amafaranga yatanzwe hakorwa autopsie 39.400frw , Amafaranga yo gushyingura no gukura ikiriyo 100.000frw, ikurikirarubanza angana na 100.000Frw no gusubiza amafaranga yatanzweho ingwate y'amagarama angana na 20.000Frw,Amafaranga y'igihembo cy'Avoka angana na 700,000Frw. Igiteranyo cy’indishyi zose hamwe kingana na miliyoni cumi n’ebyiri ibihumbi magana cyenda na mirongo itatu n’icyenda na magana ane na mirongo itanu(12,939,450frw).Sonarwa Gi Company Ltd ntiyishimiye imikirize y’ urubanza ijuririra mu Rukiko Rukuru rwa Musanze, ikirego kirakirwa gihabwa RCA00006/2023/HC/MUS , ruburanishwa muruhame kuwa 08/06/2023 Sonarwa Gi Company Ltd ihagarariwe na Me Bimenyimana Eric naho abaregwa bose bahagarariwe na Me Dukundane Anastase. [4] Me Bimenyimana Eric ahagarariye Sonarwa Gi Company yavuze ko impamvu yatumye bajuririra urubanza RC00074/2021/TGI/MUS rwaciwe n'Urukiko Rwisumbuye rwa Musanze kuwa 09/01/2023 ari uko mu ica ry’urubanza ku rupapuro rwa gatatu, igika cya 7, rwashingiye ku ngingo ya 255 y’itegeko No 32/2016 ryo kuwa 28/08/2016 rigenga abantu n’umuryango ngo umwana agomba guha agaciro ababyeyi be, kububaha no kubaha ibibatunga igihe babikeneye ndetse ko mu gika cya 8, ngo

rwavuze ko kuba nyakwigendera yarabanaga n’ababyeyi be yashoboraga kubaha ibibatunga . Me Bimenyimana Eric yakomeje avuga ko urukiko rwashingiye ku ngingo itariyo kuko iyagombaga gushingirwaho ari ingingo 22 y’ Iteka rya Perezida riteganya ibyerekeye indishyi zikomoka ku mpanuka z’ibinyabiziga. [5] Me Bimenyimana Eric yakomeje avuga ko ababyeyi n’abavandimwe ba nyakwigendera batashoboye kugaragaza ko ari we wari ubatunze umunsi ku wundi, bityo ko indishyi mbangamirabukungu ntazo bari guhabwa kuko icyemezo cy’umurenge gihamya ko nyakwigendera yari atunze ababyeyi be kitari gushingirwaho. Yasoje asaba urukiko gutegeka ko indishyi z’ibangamirabukungu zaciwe SONARWA GI Company zakurwaho kuko hari n’imanza z’Urukiko rw’Ikirenga zabitanzeho umurongo. [6] Me Dukundane Anastase ahagarariye abaregwa yavuze ko indishyi mbangamirabukungu zagombaga kugenerwa ababyeyi be kuko babuze umwana wabo kandi wari ufite icyo abamariye, asobanura ko kuba uhagarariye SONARWA avuga ko izi ndishyi zitari gutangwa kuko ababyeyi ba nyakwigendera baterekanye ibimenyetso by’uko bafashwaga na nyakwigendera nta shingiro bifite kuko Ahishakiye Jean Damascene yari umusore ufite imyaka 21 ubana n’ababyeyi be kandi batifashije, byumvikana ko nk’umwana w’umusore yari afite inshingano zo kwita ku babyeyi be dore ko bari bakuze kandi batishoboye. Urukiko rugiye gusuzuma ibibazo bikurikira: Kumenya itegeko ryari gushingirwaho hagenwa indishyi mbangamirabukungu muri uru rubanza; Kumenya niba hari ibimenyetso abarega batanze bigaragaza ko nyakwigendera Ahishakiye yari atunze ababyeyi be;

Page 4

Kumenya niba indishyi z’igihembo cya Avoka , iz’ikurikiranarubanza ndetse n’izo gukura ikiriyo zaragenwe mu buryo bwubahirije amategeko; Kumenya niba indishyi zasabwe muri uru rubanza mu bujurire zifite ishingiro. II. ISESENGURA RY’ IBIBAZO BIGIZE URUBANZA Kumenya itegeko ryari gushingirwaho hagenwa indishyi mbangamirabukungu muri uru rubanza: [7] Me Bimenyimana Eric uhagarariye Sonarwa Gi Compny Ltd avuga ko ibyo banenga mu rubanza rujuririrwa ari uko urukiko mu kugena indishyi mbangamirabukungu rwashingiye ku ngingo ya 255 y’itegeko No 32/2016 ryo kuwa 28/08/2016 rigenga abantu n’umuryango iteganya ko umwana agomba guha agaciro ababyeyi be, kububaha no kubaha ibibatunga igihe babikeneye. Urukiko kandi, mu gika cya 8 cy’urubanza rwajuririwe, rwavuze ko kuba nyakwigendera Ahishakiye yarabanaga n’ababyeyi be yashoboraga kubaha ibibatunga , aha rero akaba yarashingiye ku ngingo itari yo, kuko ingingo ya 22 y’Iteka rya Perezida niyo ishingirwaho hasabwa izi ndishyi ndetse banazitanga ikaba rero iteganya ko abafite uburenganzira ku buryo byumvikana ko bari batunzwe n’uwahohotewe nibo bonyine bashobora guhabwa indishyi z’ibangamirabukungu. [8] Me Dukundane Anastase ahagarariye abaregwa yavuze ko ababyeyi ba nyakwigendera Ahishakiye bari basanzwe ari abakene bizwi ko bagomba gufashwa, ngo bakaba bari basanzwe bafite umwana ubafasha guhangana n’ikibazo cy’ ubukene ngo ibi kandi

ingingo ya 255 y’ itegeko ryashingiweho ry’ umuryango ikaba ibisobanura neza aho ivuga ko umwana agomba guha agaciro ababyeyi be bityo ko nta makosa yakozwe. UKO URUKIKO RUBIBONA: [9] Ingingo ya 22 y’ itegeko rya Perezida N° 31/01 ryo kuwa 25/08/2003 rishyiraho uburyo bwo kwishyura indishyi ku bubabare bw’umubiri buturutse ku mpanuka zitewe n’ibinyabiziga iteganya ko Ibangamirabukungu rikorewe abafite uburenganzira bitewe n'urupfu rw'umuntu ritangirwa indishyi hakurikijwe umusaruro uva ku murimo umuntu atahana nk'uko ugenwa n'ingingo ya 4 y'Itegeko N°41/2001 ryo ku wa 19/09/2001 ryerekeye itangwa ry'indishyi ku bahohotewe biturutse ku mpanuka zo ku mubiri zitewe n'ibinyabiziga. Abafite uburenganzira ku buryo byumvikana ko bari batunzwe n'uwahohotewe ni bo bonyine bashobora guhabwa indishyi. Ingingo ya 255 (2) y’Itegeko Nº 32/2016 ryo ku wa 28/08/2016 rigenga abantu n’umuryango iteganya ko Umwana agomba guha agaciro ababyeyi be, kububaha no kubaha ibibatunga igihe babikeneye. [10] Urukiko rurasanga Umushingamategeko yarashyizeho itegeko ryihariye rikoreshwa mu kugena indishyi ku bubabare bw’ umubiri buturutse ku mpanuka zitewe n’ibinyabiziga bityo rikaba ari ryo ryagombaga gushingirwaho mbere na mbere mu kugena indishyi z’ibangamirabukungu aho gushingira ku itegeko rigenga abantu n’umuryango. Kumenya niba hari ibimenyetso abarega batanze bigaragaza ko nyakwigendera Ahishakiye yari atunze ababyeyi be:

Page 5

[11] Me Bimenyimana Eric ahagarariye Sonarwa Gi Company Ltd yavuze ko ababyeyi ba Ahishakiye ndetse n’abavandimwe be badashobora kugaragaza ko ariwe wari ubatunze umunsi ku wundi, ntibagaragaza aho yakuraga ibibatunga cyane ko ntacyo yari afite akora ndetse ngo ntibabashije kugaragaza uburyo yabahaga amafaranga abatunga kuko ikigaragara nawe ntabwo yari yifashije kuko nawe yari akeneye ubufasha bwa Leta kuko yarabarurirwaga mu cyiciro cya mbere cy’ubudehe kandi aba bantu bo muri icyi cyiciro batungwa na Leta kuko baba batishoboye, ukaba rero wakwibaza ukuntu umuntu udashoboye kwibeshaho yatunga abandi. Ko kubera izo mpamvu zose, urukiko rwisumbuye rutagombaga kubagenera indishyi z’ibangamirabukungu. [12] Me Bimenyimana Eric ahagarariye Sonarwa yasobanuye ko ibyo bavuga babishingira ku rubanza RCAA0049/14/CS rwaciwe kuwa 25/11/2016 ku rupapuro rwa 7-8, mu gace ka 19 , aho urukiko rw’Ikirenga rwemeje ko icyemezo cyatanzwe n’ubuyobozi bw’umurenge nta gaciro cyahabwa kuko atari ikimenyetso gihamya ko abaregwa bahabwaga mu buryo buhoraho (regulierement) ibibatunga ndetse ko kitanagaragaza impamvu idasanzwe yatumaga abatunga kandi bose bujuje imyaka y’ubukure. Ikindi ngo ntibabasha no kugaragaza uburyo yabahaga ibyo bibatunga (cheque, message wenda ziboherereza ayo mafaranga regulierement…). Yakomeje asobanura ko ibi byanasobanuwe mu rubanza RCA00002/2018/HC/RSZ rwaciwe

kuwa 30/05/2018 aho Icyimpaye yaregaga asaba indishyi mbangamirabukungu ku mpanuka yahitanye umuhungu we hanyuma urukiko rukavugako ntazo ahabwa kuko ntakigaragaza ko ariwe wari umutunze . [13] Me Dukundane Anastase ahagarariye abaregwa yavuze ko SONARWA idakwiye kugendera ku cyiciro cy’ubudehe gusa kuko hari n’ibindi bimenyetso byagaragarijwe urukiko, ngo ikindi kandi SONARWA nayo ntibasha kugaragaza niba koko nyakwigendera Ahishakiye atari we wari atunze umuryango we kuko yari umunyonzi kandi yari akiri ingaragu ataha iwabo, asoza asaba urukiko kwemeza ko ubujurire bwabo nta shingiro bufite.

UKO URUKIKO RUBIBONA [14] Ingingo ya 22 y’ Itegeko rya Perezida N° 31/01 ryo kuwa 25/08/2003 rishyiraho uburyo bwo kwishyura indishyi ku bubabare bw’umubiri buturutse ku mpanuka zitewe n’ibinyabiziga iteganya ko Ibangamirabukungu rikorewe abafite uburenganzira bitewe n'urupfu rw'umuntu ritangirwa indishyi hakurikijwe umusaruro uva ku murimo umuntu atahana nk'uko ugenwa n'ingingo ya 4 y'Itegeko N°41/2001 ryo ku wa 19/09/2001 ryerekeye itangwa ry'indishyi ku bahohotewe biturutse ku mpanuka zo ku mubiri zitewe n'ibinyabiziga. Abafite uburenganzira ku buryo byumvikana ko bari batunzwe n'uwahohotewe ni bo bonyine bashobora guhabwa indishyi. [15] Iyi ngingo yumvikanisha ko bidahagije kwerekana ko hari amasano usaba indishyi z’ibangamirabukungu afitanye na nyakwigendera gusa, ko ahubwo agomba no gutanga ibimenyetso byerekana ko yari asanzwe ari mu nshingano zo kumutunga. [16] Ibimaze kuvugwa mu gika kibanziriza iki byatanzweho umurongo n’Urukiko rw’Ikirenga mu rubanza RS/INJUST/RC 00021/2022/SC haburana Mukagatare Regine na SANLAM AG Plc aho mu gika cyarwo cya 36, Urukiko rwavuze ko Mukagatare Regine nta ndishyi mbangamirabukungu agomba guhabwa kuko nta kimenyetso kigaragaza ko yari asanzwe atunzwe na nyakwigendera Habyarimana Pacifique.

Page 6

[17] Mu rwego rwo gutanga ubutabera bumwe ku bibazo bisa , urukiko rurasanga kuba Me Dukundane Anastase uhagararaiye abaregera indishyi avuga ko indishyi mbangamirabukungu ababyeyi ba nyakwigendera bagomba kuzihabwa hashingiwe ku cyemezo kigaragaza ko ababyeyi be bari mu cyiciro cya mbere, ko bari bakeneye ubufasha, nta shingiro byahabwa mu gihe bidashyigikiwe n’ibindi bimenyetso kuko no mu rubanza rujuririrwa nta kimenyetso urukiko rwashingiyeho rutanga izo ndishyi. Bityo rero iki kibazo kiri muri uru rubanza kikaba gisa n’icyakemuwe mu rubanza rwavuzwe hejuru rwa Mukagatare Regine na SANLAM AG PLC, bityo bikaba bigomba gukemurwa kimwe. [18] Urukiko rukaba rusanga ubujurire bwa SONARWA GI Company Ltd bufite ishingiro, bityo ko indishyi mbangamirabukungu zari zahawe ababyeyi ba nyakwigendera Ahishakiye mu rubanza rujuririrwa zingana na miliyoni zirindwi n’ ibihumbi umunani Magana inane mirongo itanu (7,008,850Frw) zikuweho. Kumenya niba indishyi z’igihembo cya Avoka , iz’ikurikiranarubanza ndetse n’izo gukura ikiriyo zaragenwe mu buryo bwubahirije amategeko: [19] Ingingo ya 34 y’amabwiriza N° 01/2014 agena ibihembo mbonera by’abavoka iteganya ko Avoka afite uburenganzira bwo kugena igihembo ashyize mu gaciro, ariko kitari munsi y’ ibihumbi magana atanu ( 500.000Frw ) ariko kitarenze 3.000.000Frw [20] Uhagarariye SONARWA yavuze ko ibihumbi Magana arindwi ( 700.000Frw)

y’ igihembo cy’ Avoka, ibihumbi ijana ( 100.000Frw) y’ikurikiranarubanza na 100.000 Frws yo gushyingura, yagenewe abaregera indishyi ari menshi cyane, ko ku bijyanye n’igihembo cy’ Avoka inkiko zimenyereye gutanga ibihumbi magana atanu (500.000Frws). [21] Hashingiwe ku biteganywa n’iriya ngingo y’amabwiriza agena ibihembo mbonera by’Abavoka, Urukiko rurasanga nta makosa yakozwe mu gutanga igihambo cy’ avoka kirengeje ibihumbi Magana atanu, bityo ubujurire kuri iyi ngingo nta shingiro bufite. Naho ku byerekeye ibihumbi ijana (100.000Frws) by’ikurikiranarubanza na 100.000Frws yo gukura ikiriyo, urukiko rusanga ziriya ndishyi zagenwe ku rwego rwa mbere mu bushishozi bw’urukiko atari ikirenga kuko bisanzwe bizwi neza ko iyo umuntu yitabye Imana habaho gukura ikiriyo kandi bikaba bisaba amafaranga menshi mu by’ukuri, hakaba kandi harabayeho no gukurikirana urubanza, Urukiko rurabona indishyi zagenwe zigereranyije, bityo kuri iyi ngingo naho nta gihundutse. Kumenya niba indishyi zasabwe muri uru rubanza mu bujurire zifite ishingiro: [22] Ingingo ya 111 y’itegeko No 22/2018 ryo kuwa 29/04/2018 ryerekeyeimiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko ikirego cy’amafaranga y’ikurikiranarubanza ari ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga

y’ikurikiranarubanza kiburanishirizwa rimwe n’ikirego cy’iremezo. [23] Hashingiwe ku byavuzwe haruguru, aho urukiko rwagaragaje ko ubujurire bwa SONARWA bufite ishingiro kuri bimwe, Urukiko rurasanga nta gihembo cy’ Avoka bakwiye guhabwa kuko bigaragara ko batsinze kuri bimwe, bagatsindwa ku bindi. [24] Ibimaze kuvugwa mu gika kibanziriza iki biri mu mujyo umwe n’ibyemejwe n’Urukiko rw’Ikirenga mu rubanza RCAA0049/14/CS rwaciwe kuwa 25/11/2016 (igika cya 36, urupapuro

Page 7

rwa 12), haburana SORAS AG LTD na Umuhoza Pacifique, Izabayo Sylvie na Niyoyita Jacques, aho rwemeje ko nta muburanyi ukwiye guhabwa indishyi z’ikurikiranarubanza ndetse n’amafaranga y’igihembo cya Avocat mu gihe buri ruhande rufite ibyo rwatsindiye n’ibyo rwatsindiwe. III. ICYEMEZO CY’ URUKIKO [25] Urukiko rwemeye kwakira ikirego cya SONARWA GI Ltd , rugisuzumye rusanga gifite ishingiro kuri bimwe. [26] Rutegetse urubanza RC00074/2021/TGI/MUS rwaciwe n'urukiko rwisumbuye rwa Musanze kuwa 09/01/2023 ruhindutse ku bijyanye n’indishyi mbangamirabukungu gusa. [27] Rwemeje ko indishyi mbangamirabukungu zari zahawe ababyeyi ba Ahishakiye Damascene zingana na miliyoni zirindwi n’ ibihumbi umunane na Magana inane na mirongo itanu (7,008,850Frw) zikuweho. [28] Rwemeje ko nta ndishyi zitanzwe muri uru rubanza mu bujurire. [29] Rutegetse Bigirimana Jean Baptiste, Habarurema Felicien, Ndacyayisaba Emmanuel , Nkurunziza Silas , Nyirakabanza Beatrice , Nyirambabazi Esperance na Uwimana Christine gusubiza SONARWA ibihumbi mirongo ine (40.000Frw) yatanze y’ingwate y’igarama.