UBUSHINJACYAHA vs. NSHIMIYIMANA

UBUSHINJACYAHA vs. NSHIMIYIMANA

- Source: Amategeko - Section: Decisions (Judgements) - Date: 2024-12-20 - Case/document no.: RPAA 00300/2024/CA - Collection: Court of Appeal

Text

Page 1

UBUSHINJACYAHA vs. NSHIMIYIMANA [Rwanda RUKIKO RW’UBUJURIRE – RPAA 00300/2024/CA (Kanyange, P.J.,) 20 Ukuboza 2024] Amategeko agenga imanza nshinjabyaha – Ibimenyetso – Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye. Urukiko nirwo rwemeza ko ibyo bimenyetso bishobora kwemerwa. Incamake y’ikibazo: Nshimiyimana Nicolas w’imyaka makumyabiri nikenda (29) y’amavuko akurikiranyweho icyaha cyo gusambanya umwana w’imyaka cumi n’itanu (15) wiswe I.B muri uru rubanza, Ubushinjacyaha bukaba bwaramureze. Iperereza kuri icyo cyaha rirangiye, Ubushinjacyaha bushingiye ku mvugo z’uwo mwana, ku mvugo za nyina n’iz’abatangabuhamya, bwamureze mu Rukiko Rwisumbuye rwa Muhanga bumukurikiranyeho icyaha cyo gusambanya umwana, bumusabira igifungo cy’imyaka makumyabiri n’itanu (25). Nshimiyimana yaburanye ahakana icyaha, Urukiko rwaciye urubanza, rusanga hari ibimenyetso bitandukanye bimuhamya icyaha birimoimvugo ze mu Bugenzacyaha hamwe n’ubuhamya butandukanye. Uru Rukiko rushingiye kuri ibyo bimenyetso, rwemeje ko Nshimiyimana Nicolas ahamwa n’icyaha cyo gusambanya umwana, maze rumuhanisha igifungo cy’imyaka makumyabiri n’itanu (25). Nshimiyimana ntiyishimiye imikirize y’ urubanza maze ajurira mu Rukiko Rukuru, Urugereko rwa

Nyanza, avuga ko mu kumuhamya icyaha Urukiko rwa mbere rwashingiye ku mvugo z’abatangabuhamya bahuriye ku mugambi wo kumuhimbira icyaha, avuga kandi ko mu cyemezo cya muganga ntahemejwe ko basanze uwo mwana yarasambanyijwe, bityo nta cyemeza ko yasambanyije umwana. Ubushinjacyaha bwasubije ko iby’uko Nshimiyimana yahatiwe kwemera icyaha nta shingiro bifite kuko mu nzego zose ntaho yigeze abivugaho. Urukiko rwaciye urubanza maze rusanga ibivugwa na Nshimiyimana ko abatangabuhamya bamuhimbiye icyaha nta shingiro bifite, maze rwemeje ko ubujurire bwe nta shingiro bufite, bityo imikirize y’urubanza rwajuririwe idahindutse, maze igifungo cy’imyaka makumyabiri n’itanu (25) yahanishijwe kigumyeho. Nshimiyimana ntiyishimiye imikirize y’urubanza, maze ajurira bwa kabiri mu Rukiko rw’Ubujurire, avuga ko yanenze urubanza rujuririrwa ku mpamvu y’uko Urukiko rwashingiye ku kuba iwe harafatiwe udukingirizo tubiri twakoreshejwe kandi nta suzuma twakorewe, kandi ko yahatiwe kwemera icyaha. Uhagarariye Ubushinjacyaha avuga ko izo mpamvu nta shingiro zifite, kuko n’ubwo ku birebana n’udukingirizo habayeho kwibeshya kuko inyandikomvugo y’ifatira itavuga udukingirizo

Page 2

twakoreshejwe, ibindi Nshimiyimana avuga ko yahatiwe kwemera icyaha bitahabwa agaciro kuko nta kimenyetso yabigaragarije. Ikibazo kigomba gusuzumwa muri uru rubanza ni ukumenya niba ibimenyetso bigizwe n’udukingirizo twafatiriwe, ukwemera icyaha kwa Nshimiyimana n’imvugo z’abatangabuhamya bitaragombaga gushingirwaho mu kumuhamya icyaha akurikiranyweho. Incamake y’icyemezo: 1.Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye. Urukiko nirwo rwemeza ko ibyo bimenyetso bishobora kwemerwa. 2.Umucamanza afite uburenganzira bwo gushingira ku mpamvu nyoroshyacyaha ashingiye ku kuba uregwa ari ubwa mbere akurikiranweho icyaha mu buryo buzwi. Ubujurire nta shingiro bufite. Nta mategeko yashingiweho: Imanza zifashishijwe: Urubanza RPAA 00692/2021/CA, rw’ Ubushinjacyaha na Ndayishimiye Jean Damascène, rwaciwe n’Urukiko rw’Ubujurire ku wa 20/01/2023; Urubanza RPAA 00537/2023/CA, rw’Ubushinjacyaha na Mbarushimana Yangu, rwaciwe n’Urukiko rw’Ubujurire ku wa 30/09/2024; urubanza RPAA 00299/2023/CA rw’Ubushinjacyaha na Hagenimana Erimereki, rwaciwe n’Urukiko rw’Ubujurire ku wa 29/04/2024. Urubanza I. IMITERERE Y’URUBANZA [1] Nshimiyimana Nicolas akurikiranyweho icyaha cyo gusambanya umwana w’imyaka cumi n’itanu (15) wiswe I.B

muri uru rubanza, Ubushinjacyaha bukaba bwaramureze buvuga ko yamusambanyije ku wa 08/04/2020 abanje kumwereka filimi y’urukozasoni, amubwira ko nabivuga azamurogesha igitsina kikajya ku gahanga. [2] Iperereza kuri icyo cyaha rirangiye, Ubushinjacyaha bushingiye ku mvugo z’uwo mwana, ku mvugo za nyina n’iz’abatangabuhamya, bwamureze mu Rukiko Rwisumbuye rwa Muhanga bumukurikiranyeho icyaha cyo gusambanya umwana, bumusabira igifungo cy’imyaka makumyabiri n’itanu (25). [3] Nshimiyimana Nicolas yaburanye ahakana icyaha, avuga ko yemera ko uwo mwana yaje kugura amandazi akayamuha akanayarira aho ariko ko atigeze amusambanya.

Page 3

[4] Urukiko rwaciye urubanza RP 00388/2020/TGI/NYG ku wa 26/11/2020, rusanga hari ibimenyetso bitandukanye bihamya icyaha Nshimiyimana Nicolas birimo: imvugo ze mu Bugenzacyaha, kuko yavuze ko yemera icyaha n’ubwo mu bisobanuro yatanze yavuze ko yari agiye gusambanya I.B amaze kwiyambura nawe amaze kwambara agakingirizo ntiyabikora kuko umukozi we yahise yinjira, ariko ko kuba yaremeye ko yamaranye n’uwo mwana amasaha arenga atatu mu nzu akanemera ko yamuguriye jus ngo akanamuha telephone ngo arebe amashusho, bifitanye isano n’ibyo umwana yavuze; ubuhamya bwa Mukaremo Esther wavuze ko Nshimiyimana yaje gusaba umugabo we ngo azimye itara kuko hari umuntu ushaka gusohoka iwe, barebye basanga ari uwo mwana bituma batanga amakuru; ubuhamya bw’umukozi we wavuze ko yavuye kurangura amandazi agasanga shebuja ari mu cyumba akumva avugana n’undi muntu; [5] Rushingiye kuri ibyo bimenyetso no ku ngingo z’amategeko zirebana n’ibimenyetso manza nshinjabyaha, rwemeje ko Nshimiyimana Nicolas ahamwa n’icyaha cyo gusambanya umwana, rumuhanisha igifungo cy’imyaka makumyabiri n’itanu (25). [6] Nshimiyimana Nicolas yajuriye mu Rukiko Rukuru, Urugereko rwa Nyanza, avuga ko mu kumuhamya icyaha Urukiko rwa mbere rwashingiye ku mvugo z’abatangabuhamya bahuriye ku mugambi wo kumuhimbira icyaha, umugenzacyaha na we amuhatira kwemera ibyo abo batangabuhamya bamushinja bituma yemera icyaha

yirengera, asaba kudaha agaciro ibyavuzwe n’abo batangabuhamya ndetse n’imvugo ze zo mu Bugenzacyaha kuko no mu cyemezo cya muganga ntahemejwe ko basanze uwo mwana yarasambanyijwe. [7] Ubushinjacyaha bwasubije ko iby’uko Nshimiyimana yahatiwe kwemera icyaha nta shingiro bifite kuko mu nzego zose ntaho yigeze abivugao, kandi ko ntacyo agaragaza yaba apfa n’abatangabuhamya cyatuma bumvikana kugira ngo bamuhimbire icyaha banahuze n’ibyo umwana yavuze kandi binahura na bimwe mu byo Nshimiyimana Nicolas yemeye mu Rukiko by’uko yamuguriye jus, ko rero nta mpamvu ifatika yatuma urubanza rwo ku rwego rwa mbere ruhindurwa. [8] Urukiko rwaciye urubanza RPA 01116/2020/HC/NYZ ku wa 26/03/2024, rusanga: Ibivugwa na Nshimiyimana ko abatangabuhamya bamuhimbiye icyaha nta shingiro bifite, kuko abatangabuhamya avuga aribo Baziruwiha Primian n'umugore we Mukaremo Esther atari bo bonyine bemeje ko yari mu nzu n’uwo mwana, kuko n’umukozi we yemeje ko yasanze ari kumwe n’umuntu mu cyumba cye, bikanemezwa n’uwitwa Uwiduhaye Salama waje kugura ibintu akicarana n’abandi ku rubaraza bategereje ko umuntu wari kumwe na Nshimiyimana asohoka, akaza kurambirwa agataha, ko abo bose batari guhuriza ku mugambi umwe wo kumubeshyera; mu babatangabuhamya ntawemeje ko yumvise cyangwa ngo abone Nshimiyimana Nicolas asambanya I.B ahubwo bose bemeje ko yari kumwe n’uwo mwana mu cyumba araramo, uwo mwana akaba ari we wasobanuye ibyo bakoranye, ko kandi ukuri kw’ibyo uwo mwana yavuze gushimangirwa n`uko mu byafatiriwe mu cyumba cya Nshimiyimana Nicolas harimo udukingirizo tubiri (2) twakoreshejwe;

Page 4

ibyo Nshimiyimana Nicolas yasobanuye mu Bugenzacyaha bihura n’ibyo uwo mwana yavuze ndetse n’ibyavuzwe n’abatangabuhamya kandi uburyo Nshimiyimana Nicolas yasobanuyemo ibintu bugaragaza ko yari yisanzuye ku buryo bitabangikanywa no kuvuga ko yemejwe n`inkoni yakubiswe n’umugenzacyaha, usibye ko nta n’ibimenyetso bifatika abigaragariza uretse kubivuga gusa. [9] Rwemeje rero ko ubujurire bwe nta shingiro bufite, ko imikirize y’urubanza rwajuririwe idahindutse, ko n’igifungo cy’imyaka makumyabiri n’itanu (25) yahanishijwe kigumyeho. [10] Nshimiyimana Nicolas ntiyishimiye imikirize y’urubanza ajurira bwa kabiri mu Rukiko rw’Ubujurire, urubanza rwandikwa kuri RPAA 00300/2024/CA, ruhabwa itariki yo kuburanishwa yo ku wa 10/12/2024, uwo munsi ruburanishwa yunganiwe na Me Mukwende Milimo Olivier, Ubushinjacyaha buhagarariwe na Bunyoye Grâce, Umushinjacyaha ku rwego rw’Igihugu. [11] Mu myanzuro y’ubujurire no mu miburanire, Nshimiyimana Nicolas n’umwunganira bavuga ko banenge urubanza rujuririrwa ku mpamvu y’uko Urukiko rwashingiye ku kuba iwe harafatiwe udukingirizo tubiri twakoreshejwe kandi nta suzuma twakorewe, ko rwanashingiye ko yemeye icyaha kandi yarasobanuye ko yahatiwe kucyemera, runashingira ku batangabuhamya kandi ntawamubonye asambanya I.B. [12] Uhagarariye Ubushinjacyaha avuga ko izo mpamvu nta shingiro zifite, kuko n’ubwo ku birebana n’udukingirizo habayeho kwibeshya

kuko inyandikomvugo y’ifatira itavuga udukingirizo twakoreshejwe, ibindi Nshimiyimana avuga ko yahatiwe kwemera icyaha bitahabwa agaciro kuko nta kimenyetso yabigaragarije, naho abatangabuhamya bakaba bataremeje ko bamubonye asambanya I.B ahubwo bavuze ko yabasabye kuzimya amatara kugira ngo uwo mwana asohoke. [13] Ikibazo kigomba gusuzumwa muri uru rubanza ni ukumenya niba ibimenyetso bigizwe n’udukingirizo twafatiriwe, ukwemera icyaha kwa Nshimiyimana n’imvugo z’abatangabuhamya bitaragombaga gushingirwaho mu kumuhamya icyaha akurikiranyweho. II. ISESENGURA RY’IBIBAZO BIRI MU RUBANZA Kumenya niba ibimenyetso bigizwe n’udukingirizo twafatiriwe, ukweme icyaha kwa Nshimiyimana n’imvugo z’abatangabuhamya bitaragombaga gushingirwaho mu kumuhamya icyaha akurikiranyweho [14] Nshimiyimana Nicolas n’umwunganira bavuga ko mu bimenyetso byashingiweho n’Urukiko Rukuru, rwavuze ko hafatiriwe udukingirizo tubiri twakoreshejwe ariko tukaba tutarapimwe ngo harebwe niba ari we wadukoresheje, ko rero tutagombaga gushingirwaho nk’ikimenyetso kimushinja gusambanya I.B. [15] Bavuga kandi ko Urukiko rwashingiye ku byo yemeye mu Bugenzacyaha kandi ntaho yemeye ko yasambanyije I.B, ko kandi n’iyo byafatwa ko yemeye, Urukiko rutari kwirengagiza umurongo watanzwe kuri icyo kibazo mu rubanza RPAA 0057/15/CS rwaciwe n’Urukiko rw’Ikirenga ku wa 11/05/2018 rukemeza ko kwemera icyaha atari ikimenyetso kihagije ahubwo kigira agaciro iyo giherekejwe n’ibindi bimenyetso.

Page 5

[16] Banenga kandi kuba Urukiko rwarashingiye ku batangabuhamya kandi ntawamubonye asambanya I.B, ko ahubwo byatewe n’amashyari ashingiye ku kuba bari badikanyije imiryango (y’ubucuruzi) bakaba baravugaga ko abakorana. [17] Uhagarariye Ubushinjacyaha avuga ko izo mpamvu z’ubujurire nta shingiri zifite, kuko n’ubwo ku birebana n’udukingirizo habayeho kwibeshya kuko inyandikomvugo y’ifatira itavuga udukingirizo twakoreshejwe, ibindi Nshimiyimana Nicolas anenga urubanza rwajuririwe nta shingiro bifite, kuko iby’uko yahatiwe kwemera icyaha nta kimenyetso yabigaragarije kandi urukiko rukaba rutashingira ku mvugo ye gusa, ko ndetse n’uburyo yatongetsemo uko ibintu uko byagenze bigaragaza ko bitavuzwe n’umuntu wakubitwaga. [18] Ku birebana n’abatangabuhamya, uhagarariye Ubushinjacyaha avuga ko ibyo Nshimiyimana abanenga nta shingiro bifite kuko batavuze ko bamubonye asambanya I.B ahubwo bavuze ko yabasabye kuzimya amatara ababwira ko hari umuntu ushaka gutambuka, ko kandi ubuhamya bwabo bushimangirwa n’ubw’umukozi we kuko yavuze ko yumvise shebuja avugana n’umuntu mu cyumba, bukanashimangirwa kandi n’imvugo za I.B wasobanuye uko Nshimiyimana yamusambanyije, nawe kandi akaba yemera ko uwo mwana yaje iwe, ko rero ibyo bimenyetso bihagije kugira ngo hemezwe ko yasambanyije uwo mwana.

UKO URUKIKO RUBIBONA [19] Impaka ziri muri uru rubanza zishingiye ku bimenyetso Nshimiyimana avuga ko bitagombaga gushingirwaho mu kumuhamy icyaha. [20] Ku byerekeye ibimenyetso mu manza n’itangwa ryabyo, byasesenguwe mu rubanza RPAA 00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na Ndayishimiye Jean Damascène, Urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. Uyu murongo kandi wagiye ukurikizwa mu zindi manza zaciwe n’uru Rukiko, harimo urubanza RPAA 00537/2023/CA, rwaciwe n’Urukiko rw’Ubujurire ku wa 30/09/2024 haburana Ubushinjacyaha na Mbarushimana Yangu. [21] Ku birebana n’ikimenyetso cy’udukingirizo, bigaragara ko mu rubanza rujuririrwa Urukiko rwadushingiyeho rushaka kugaragaza ukuri kw’ibyo I.B yavuze by’uko yasambanyijwe na Nshimiyimana, rusanga bishimangirwa n’uko hari udukingirizo tubiri twakoreshejwe twafatiwe iwe, ariko bikaba bigaragara ko habayeho kwibeshya kuko inyandikomvugo y’ifatira ivuga gusa ko bahasanze agakarito k’udukingirizo gasanzwe kabamo dutatu harimo agakingirizo kamwe, Uru Rukiko rukaba rusanga ariko ibi ubyabyo bitavanaho ukuri kw’ibyo I.B yavuze

kuko hari ibindi bimenyetso bibishimangira. [22] Ku birebana n’uko ibyo Nshimiyimana yemeye mu Bugenzacyaha bitagombaga gushingirwaho ngo kuko yahatiwe kucyemera, Urukiko rurasanga harebwe imikirize y’urubanza rwajuririwe, ntaho Urukiko Rukuru rwashingiye ku kuba Nshimiyimana yaremeye ko yasambanyije I.J kuko no mu nyandikomvugo yakorewe mu Bugenzacyaha, n’ubwo yabajijwe ko yemera icyaha agasubiza ko acyemera, bigaragara ko mu bisobanuro yatanze yaravuze ko yari

Page 6

agiye gusambanya uwo mwana ariko bateshwa n’umukozi we wahise akubita urugi uwo mwana akagira ubwoba. Bigaragara ahubwo ko Urukiko Rukuru rwasanze ibikubiye muri iyo nyandikomvugo bihura n’ibyo uwo mwana yasobanuye ndetse n’ibyo abatangabuhamya bavuze, rusanga kandi uburyo yasobanuye uko ibintu byagenze kuva umwana agera aho yacururizaga no kugera ahavuye, bugaragaza ko yari yisanzuye ku buryo atavuga ko yemejwe n`inkoni. [23] Urukiko rurasanga rero, n’ubwo Nshimiyimana yavuze gusa ko yemera icyaha ariko mu bisobanuro akavuga ko yateshejwe agiye gusambanya I.B, ntacyari kubuza ko ibyo yasobanuye bishingirwaho cyane cyane ko bihura n’imvugo z’umwana wasambanyijwe hamwe n’iz’abatangabuhamya, kandi nk’uko Urukiko Rukuru rwabibonye, kuba ibyo yavuze bihura n’iby’abandi ni ikimenyetso cy’uko yabivuze yisanzuye, kuko atari guhatirwa kuvuga ibintu ngo ibyo yavuze ku gahato abihurizeho n’abandi. [24] Ku birebana n’imvugo z’abatangabuhamya Nshimiyimana avuga ko zitagombaga gushingirwaho ngo kuko ntawamubonye asambanya I.B, Urukiko rurasanga mu rubanza rujuririrwa, Nshimiyimana yaranengaga ko Urukiko rwashingiye ku mvugo z’abatangabuhamya bahurije ku mugambi wo kumuhimbira icyaha, urwo Rukiko rusanga ariko nta mutangabuhamya wemeje ko yumvise cyangwa ko yabonye Nshimiyimana Nicolas asambanya I.B ahubwo ko bose bemeje ko yari kumwe n’uwo mwana mu cyumba araramo, ko uwo mwana I.B ari we

wasobanuye ibyo bakoranye. [25] Urukiko rurasanga rero ibyo Nshimiyimana anenga abatangabuhamya nta shingiro bifite, kuko batashingiweho nk’abamubonye asambanya I.B ahubwo ibyo bavuze bifite aho bihurira n’imikorere y’icyo cyaha bitewe n’uko bemeje ko yaje kubasaba kuzimya itara kugira ngo umwana abone uko atambuka, ibi kandi nawe akaba yarabyemeye ubwo yabazwaga kuko yasobanuye ko yabasabye kuzimya itara bitewe n’uko uwo mwana yari yagize isoni zo kuhanyura, uwo mwana nawe akaba yaravuze ko Nshimiyimana Nicolas amaze kumusambanya batinye ko abantu bamubona ajya gusaba ko bazimya itara kugira ngo atambuke. [26] Urukiko rurasanga kandi usibye ibimenyetso Nshimiyimana avuga ko bitagombaga gushingirwaho, hari na raporo ya muganga yagaragaje ko I.B yari afite agakomere ku myanya ndangagitsina (0,5 cm perineal laceration), akaba ari ikimenyetso gishimangira imvugo z’uwo mwana wavuze ko yamusambanyije n’imvugo z’abatangabuhamya bamubonye asohoka kwa Nshimiyimana Nicolas nyuma yo kumaramo amasaha menshi bikingiranye. [27] Ku birebana n’igihano Nshimiyimana yahanishijwe, imikirize y’urubanza rwajuririwe igaragaza ko Urukiko Rukuru rwagumishijeho igifungo cy’imyaka makumyabiri n’itanu (25) yahanishijwe ku rwego rwa mbere, cyagenwe hashingiwe ku kuba Itegeko riteganya igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25) ku cyaha yakoze, bikaba

rero byumvikana ko hatabayeho gusuzuma niba ari cyo gikwiranye n’icyaha yakoze, kuko n’ubwo hatakwirengagizwa ko ari icyaha gikomeye, umwirondoro we utagaragaza ko hari ikindi cyaha yigeze guhanirwa, bivuze ko ari ubwa mbere akurikiranwe mu nkiko mu buryo buzwi, iyo mpamvu rero ikaba yarashoboraga gushingirwaho igihano yahawe kikagabanywa. [28] Mu kugabanya icyo gihano, Urukiko rurashingira ku zindi manza zaciwe ku bantu barezwe icyaha nk’icyo Nshimiyimana akurikiranyweho, harimo urubanza RPAA 00299/2023/CA rwaciwe ku wa 29/04/2024 haburana Ubushinjacyaha na Hagenimana Erimereki wari ufite imyaka

Page 7

29 agasambanya umwana w’imyaka cumi n’itanu (15), Urukiko rukaba rwaramugabanyirije igihano rushingiye ku kuba ari ubwa mbere akurikiranweho icyaha mu buryo buzwi rumuhanisha igifungo cy’imyaka cumi n’itanu (15); bityo hashingiwe ku kuba na Nshimiyimana ari ubwa mbere akurikiranywe mu nkiko mu buryo buzwi kandi we na Hagenimana bakaba barakoze icyaha bari mu kigero kimwe kuko nawe yari afite imyaka 29, bombi gasambanya abana bari mu kigero kimwe (b’imyaka 15), bagombye kugabanyirizwa ibihano mu buryo bumwe, ariko bitewe n’uko Nshimiyimana yari umugabo ufite umugore akaba yahabwa igihano gisumbyeho gato icyo Hagenimana yahanishijwe, cy’imyaka cumi n’itandatu (16), bivuze ko urubanza rwajuririwe ruhindutse gusa ku birebana n’igihano Nshimiyimana yari yahanishijwe. III. ICYEMEZO CY’URUKIKO [29] Rwemeje ko ubujurire bwa Nshimiyimana Nicolas nta shingiro bufite; [30] Rwemeje ko imikirize y’urubanza RPA 01116/2020/HC/NYZ rwaciwe n’Urukiko Rukuru, Urugereko rwa Nyanza ku wa 26/03/2024, ihindutse gusa ku bijyanye n’igihano Nshimiyimana Nicolas yari yahanishijwe; [31] Ruhanishije Nshimiyimana Nicolas igifungo cy’imyaka cumi n’itandatu (16) mu mwanya w’igifungo cy’imyaka makumyabiri n’itanu (25) yari yahanishijwe; [32] Rutegetse ko amagarama y’urubanza aherera ku Isanduku ya Leta kuko Nshimiyimana Nicolas afunzwe.