UBUSHINJACYAHA v HAKIZIMANA

UBUSHINJACYAHA v HAKIZIMANA

- Source: Amategeko - Section: Decisions (Judgements) - Date: 2024-09-25 - Case/document no.: RPAA 00532/2023/CA - Collection: Court of Appeal

Text

Page 1

UBUSHINJACYAHA v HAKIZIMANA [Rwanda URUKIKO RW’UBUJURIRE - RPAA 00532/2023/CA (Rugabirwa, P.J.) 25 Nzeri 2024] Amategeko agenga imiburanishirize y’imanza z’inshinjabyaha – Ubujurire – Kudaha agaciro ubujurire - Ubujurire ntibuhabwa agaciro mu gihe uwajuriye adashoboye kuvuguruza ibimenyetso bimuhamya icyaha mu rubanza rwa mbere. Amategeko agenga imiburanishirize y’imanza z’inshinjacyaha – Ibimenyetso – Raporo ya muganga - Iyo nta raporo ya muganga cyangwa ikizamini cya ADN byabonetse, urukiko rushobora guhamya uregwa icyaha rushingiye ku bindi bimenyetso biteganywa n’itegeko. Incamake y’ikibazo: Ku wa 10 Ukuboza 2018, Hakizimana yagiye mu rugo rwa Mukarutabana ruri Kimironko agiye gusura umukobwa wahabaga witwa Muhawenimana, barebana film, aza kumuniga asiga amwishe. Nyuma y’iperereza, Ubushinjacyaha bwatanze ikirego mu Rukiko Rwisumbuye rwa Gasabo burega Hakizimana kuba yarishe uwitwa Muhawenimana, ariko uregwa ahakana icyo cyaha avuga ko atazi nyakwigendera. Rushingiye ku bimenyetso byatanzwe, Urukiko rwamuhamije icyaha cy’ubwicanyi rumuhanisha igifungo cya burundu. Hakizimana ntiyanyuzwe n’icyo cyemezo akijuririra mu Rukiko Rukuru avuga ko yahamijwe icyaha nta bimenyetso. Urukiko Rukuru rwasanze ubujurire bwe budafite ishingiro ruhamishaho igihano yahawe n’Urukiko Rwisumbuye. Uregwa na none ntiyanyuzwe maze ajuririra icyo cyemezo mu Rukiko rw’Ubujurire, ubujurire bwe

burakirwa hasuzumwa ikibazo cyo kumenya niba Hakizimana yarahamijwe icyaha cy’ubwicanyi nta bimenyetso. Uregwa wanajuriye, asobanura ko yahamijwe icyaha atakoze kuko atazi nyakwigendera kandi akaba atarigeze amukoraho dore ko nta na raporo ya muganga cyangwa ADN bihamya ko yigeze amukoraho akongera ho ko n’ibimenyetso byose byatanzwe n’Ubushinjacyaha bishidikanywaho. Ubushinjacyaha buvuga ko uregwa atagaragaza ibimenyetso bivuguruza ibyashingiweho ahamywa icyaha kuko hari abamubonye uwo munsi ari kumwe na nyakwigendera kandi ko byagaragaye ko banavuganaga kuri telephone dore ko yari anatunze nimero ye. Bukomeza buvuga ko nubwo hatakozwe ikizamini cya ADN, bitavuze ko ibindi bimenyetso byashingiweho byateshwa agaciro. Incamake y’icyemezo: 1. Iyo nta raporo ya muganga cyangwa ikizamini cya ADN byabonetse, urukiko rushobora guhamya uregwa icyaha rushingiye ku bindi bimenyetso biteganywa n’itegeko.

2. Ubujurire ntibuhabwa agaciro mu gihe uwajuriye adashoboye kuvuguruza ibimenyetso bimuhamya icyaha mu rubanza rwa mbere. Ubujurire bufite ishingiro ku birebana n’igabanyagihano gusa. Amategeko yashingiweho: Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2.

Page 2

Imanza zifashishijwe: RPAA 0107/07/CS, Ubushinjacyaha na Akimanizanye Agnès rwaciwe n’Urukiko rw’Ikirenga ku wa 11/09/2009; RPAA 00103/2021/CA, Ubushinjacyaha na Ndahimana Valens rwaciwe n’Urukiko rw’Ubujurire ku wa 29/09/2022. Urubanza I. IMITERERE Y’URUBANZA [1] Ku wa 10/12/2018, uwitwa Mukarutabana Diane yavuye ku kazi mu ma saa moya n’igice z’ijoro, asanga abana be bigunze bonyine, ababaza aho umukozi wo mu rugo witwa Muhawenimana Philomène ari, bamubwira ko yaryamye kuva kare ariko ko atarongera kubyuka, ndetse ko yiriwe areba film n’umu Tonton umwe, Nyirabuja ajya kumureba, asanga yapfuye yanigishijwe inzitiramubu (Super Net). Iperereza rirangiye, Ubushinjacyaha bwafashe Hakizimana Vincent bunamurega mu Rukiko Rwisumbuye rwa Gasabo icyaha cy’ubwicanyi. Hakizimana Vincent yaburanye ahakana icyaha akavuga ko atazi nyakwigendera kandi ko atanazi aho yakoraga i Kimironko, ndetse ko ntacyari gutuma amwica kuko afite umugore we w’isezerano babana, asaba kurenganurwa akagirwa umwere. [2] Urukiko Rwisumbuye rushingiye ku kuba Hakizimana Vincent avuga ko atazi nyakwigendera Muhawenimana Philomène, kandi ko atanazi aho yakoraga i Kimironko, nyamara iperereza ryagaragaje ko yari asanzwe ari inshuti ye, ko n’ikimenyetso cya MTN kigaragaza ko bavuganye inshuro ebyiri ku wa 15/11/2018, ndetse ko telefoni y’uregwa yafatiriwe, yasanzwemo ko yari atunze nimero ya nyakwigendera kw’izina

rya Kimironko, ko hari n’abatangabuhamya bamushinja bitwa Mukashyaka Henriette, Mukeshimana François, Niyonkeshabyose David na Uwayezu Epiphanie, bemeje ko Hakizimana Vincent yari afitanye ubushuti na nyakwigendera, kandi ko Hakizimana Vincent yababwiye ko azajya gushyingura nyakwigendera ariko ko atagiyeyo, ko ahubwo yahungiye iwabo mu cyaro, ko Niyonkeshabyose David yemeje ko ku wa 10/12/2018, umunsi nyakwigendera yishweho, yabonye Hakizimana Vincent agera kwa Mukarutabana Diane mu rugo nyakwigendera yakoragamo mu gihe cya saa yine za mugitondo, ataha hafi saa kumi n’imwe ahetse agakapu, ko yasohotse ahurirana na moto yari ije kumutwara, ndetse ko Ayingeneye, umuvandimwe wa nyakwigendera, ahamya ko yabanye na Hakizimana Vincent mu rugo rw’uwitwa Sehene bakora akazi ko mu rugo harimo no kwahira ubwatsi bw’amatungo ye, yemeje ko Hakizimana Vincent yari inshuti ya murumuna we (nyakwigendera), ndetse ko yamuteretaga amwizeza kuzamugira umugore, rwaciye urubanza n° RP 00013/2019/TGI/GSBO ku wa 13/12/2019, rwemeza ko Hakizimana Vincent ahamwa n’icyaha cy’ubwicanyi, rumuhanisha igifungo cya burundu. [3] Hakizimana Vincent yajuririye urwo rubanza mu Rukiko Rukuru, avuga ko yahamijwe icyaha cy’ubwicanyi nta bimenyetso, kuko hatagaragajwe icyishe nyakwigendera, kandi ko Ubushinjacyaha bwandikiye Gereza buyisaba ko asuzumwa na muganga kugira ngo hagaragazwe niba yarakoze kuri nyakwigendera ariko ko bitakozwe. Naho uhagarariye Ubushinjacyaha avuga ko ubujurire bwe nta shingiro bufite kuko atavuguruje ibimenyetso byashingiweho bimuhamya icyaha.

Page 3

[4] Urukiko Rukuru rumaze gusesengura ibimenyetso byashingiweho ku rwego rwa mbere, hiyongereho ko ikimenyetso cyatanzwe n’Ikigo cyitwa KFL cyasuzumye umurambo wa nyakwigendera Muhawenimana Philomène kigasanga yarishwe anizwe, no kuba Niyonkeshabyose David yaremeje ko yari asanzwe azi Hakizimana Vincent ndetse ko yanamwerekanye mu basore batanu bari bafashwe bakekwaho urupfu rwa nyakwigendera, rwaciye urubanza n° RPA 00030/2020/HC/KIG ku wa 29/09/2023, rwemeza ko urubanza rwajuririwe rudahindutse, ko igifungo cya burundu Hakizimana Vincent yahanishijwe kigumyeho. [5] Hakizimana Vincent yajuririye urwo rubanza mu Rukiko rw’Ubujurire, ubujurire bwe buhabwa Nº RPAA 00532/2023/CA, urubanza ruburanishwa mu ruhame ku wa 09/09/2024, Hakizimana Vincent yunganiwe na Me Rudahusha Didier, naho Ubushinjacyaha buhagarariwe na Bunyoye Grâce, Umushinjacyaha ku rwego rw’Igihugu. [6] Mu myanzuro no miburanire ye, Hakizimana Vincent n’umwunganira basaba ko yagirwa umwere kuko hari ugushidikanya kumurengera nk’uko biteganywa n’amategeko, kubera ko nta kimenyetso kigaragaza ko yishe nyakwigendera Muhawenimana Philomène, cyane cyane ko nta raporo ya muganga (expertise médicale) igaragaza ko yamukozeho, ari ko mu gihe Urukiko rubibonye ukundi, ruzamugabanyirize ibihano kuko ari ubwa mbere azaba akoze icyaha kugira ngo ahabwe amahirwe yo kwikosora no gutekereza ku ngaruka z’icyaha no kugaruka

mu muryango nyarwanda mu gihe gikwiriye. Naho uhagarariye Ubushinjacyaha avuga ko ubujurire bwe nta shingiro bufite kuko atavuguruje ibimenyetso byashingiweho bimuhamya icyaha byavuzwe haruguru, kandi ko atagabanyirizwa ibihano kubera uburemere bw’icyaha yakoze kabone n’iyo yari kwemera icyaha akanagisabira imbabazi. [7] Urukiko ruhereye kuri izo mpaka, rurasanga ibibazo bikwiye gusuzumwa muri uru rubanza, ari ibyo kumenya niba Hakizimana Vincent yarahamijwe icyaha cy’ubwicanyi nta bimenyetso, no kumenya niba yagabanyirizwa ibihano. II.ISESENGURWA RY’IBIBAZO BIGIZE URUBANZA 1. Kumenya niba Hakizimana Vincent yarahamijwe icyaha cy’ubwicanyi nta bimenyetso [8] Hakizimana Vincent n’umwunganira bavuga ko Hakizimana Vincent yahamijwe icyaha cy’ubwicanyi nta bimenyetso kuko nta kigaragaza ko yakoze kuri nyakwigendera Muhawenimana Philomène kandi bivugwa ko yishwe anigishijwe inzitiramibi (Super Net), ariko ko nta ADN yakozwe icyaha kikimara kuba kandi aricyo kimenyetso cyari gukemura impaka kuko cyari kugaragaza ko atigeze akora kuri nyakwigendera. [9] Bavuga kandi ko atakoze icyaha kuko atari azi Muhawenimana Philomène, ko atigeze akandagira Kimironko, kandi ko atigeze amwita Kimironko muri telefoni ye, ko ahubwo ashobora kuba yararyiswe na Ayingeneye babanaga mu gipangu kimwe kubera ko ariwe wayikoreshaga kuko we atazi gusoma no kwandika, ndetse ko ari Ayingeneye wamubwiye ko Muhawenimana Philomène, murumuna we, yishwe n’ibisambo, banamutwara imashini ye, ariko ko atatorotse kuko nyuma y’iminsi 3, yafatiwe i Kabuye, aho kuba iwabo i Muhanga. Ikindi ngo nuko yakubitanye na moto akiva mu nzu kandi nta moto yari kumutegereza kuva mugitondo ngo igeze nimugoroba.

Page 4

[10] Bavuga na none ko mu Bugenzacyaha, umutangabuhamya Niyonkeshabyose David atigeze amushinja kuko atigeze avuga izina rye, ko ahubwo yavuze ko yabonye umuhungu atamenye izina. Bongeyeho ko igihe yari afungiye muri Kasho muri Kicukiro, bazanye abantu bafatanwe urumogi hasohokamo umuhungu umwe yerekana Hakizimana Vincent ngo niwe wishe nyakwigendera anavuga ko Hakizimana Vincent yari umunyonzi w’igare mu Mujyi wa Kigali kandi atarigeze aba umunyozi waryo kuko yamubajije nimero ya gilet yambaraga icyo gihe, bahita bamusubiza muri Kasho atamubwiye iyo nimero, ariko ko Urukiko Rukuru rwaciye urubanza mu buryo bugenekereje rushingiye ku bimenyetso bishidikanywaho ngo kuko yatombowe na Niyonkeshabyose David kandi yaramubeshyeye, ko ahubwo hirengagijwe ikimenyetso cya kamarampaka cya ADN cyari kumushinjura kuko cyari kugaragaza ko atigeze akora kuri nyakwigendera. [11] Basaba ko akwiye kugirwa umwere kuko nta kimenyetso kidashidikanywaho kigaragaza ko yakoze icyaha nk’uko biteganywa n’ingingo ya 111 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, iteganya ko gushidikanya birengera ushinjwa. [12] Uhagarariye Ubushinjacyaha avuga ko Hakizimana Vincent yakoze icyaha cy’ubwicanyi nk’uko byemejwe n’Urukiko Rukuru hashingiwe ku bimenyetso bihagije bigaragaza ko yagikoze n’ubwo hatakozwe ADN byasobanuwe n’urwo Rukiko. Asobanura ko muri ibyo

bimenyetso harimo imvugo z’abatangabuhamya bavuze ko Hakizimana Vincent yari afitanye ubucuti na nyakwigendera, kandi ko uyu yari yaramwise Kimironko muri telefoni ye. [13] Avuga kandi ko Ayingeneye, mukuru wa nyakwigendera, yavuze ko amakuru y’urupfu rwa murumuna we Muhawenimana Philomène yayahawe na Hakizimana Vincent, nyuma y’aho arabura, ndetse ko nimero ya telefoni ya nyakwigendera yabaga muri telefoni ya Hakizimana Vincent wamutelefonaga amubwira ko azamugira umugore igihe Ayingeneye na Hakizimana Vincent bakoraga kwa Sehene, ariko ko Ayingeneye atigeze avuga ko yatiriye Hakizimana Vincent telefoni ye ngo ayihamagaze Muhawenimana Philomène. [14] Avuga na none ko umutangabuhamya Niyonkeshabyose David yemeje ko yabonye Hakizimana Vincent mu bihe bitandukanye ubwo yazaga aho nyakwigendera Muhawenimana Philomène yakoraga, ariko ko nyirabuja yabaga adahari kubera ko yabaga yagiye ku kazi, ndetse ko umunsi nyakwigendera yiciweho, yamubonye asohotse mu gipangu akubitana na moto yahise imutwara. [15] Akomeza avuga ko Niyonkeshabyose David yavuze ko nyakwigendera na Hakizimana Vincent baje aho yakoraga barakomanga bamutira flash ngo bajye kureba film, kandi ko nyirabuja wa nyakwigendera yageze mu rugo atashye yabajije abana be aho Muhawenimana Philomène ari, bamubwira ko atigeze asohoka mu nzu, ko ahubwo yayiriwemo areba film ari kumwe n’umu Tonton. Yongeyeho ko n’ubwo Niyonkeshabyose David atari afite inshingano zo kumenya izina rya Hakizimana Vincent, ariko ko yari amuzi kuko yamwerekanye aho yari afungiye muri Kasho.

UKO URUKIKO RUBIBONA [16] Ikibazo cyerekeranye no kutavuguruza ibimenyetso byashingiweho ku rwego rwa mbere, cyafashweho icyemezo mu manza zaciwe n’uru Rukiko zirimo urubanza Nº RPAA

Page 5

00103/2021/CA rwaciwe ku wa 29/09/2022 haburana Ubushinjacyaha na Ndahimana Valens wajuriye asaba kugirwa umwere, ariko Urukiko rw’Ubujurire ntirwaha agaciro impamvu ze z’ubujurire kuko atashoboye kuvuguruza ibimenyetso bimuhamya icyaha byashingiweho mu manza za mbere, ndetse n’urubanza RPA 00018/2023/CA CMB RPA 00003/2024/CA rwaciwe ku wa 11/07/2024. [17] Nk’uko bigaragarira mu bika bya 18 na 19 by’urubanza rwajuririwe muri uru Rukiko, Hakizimana Vincent yahamijwe icyaha cy’ubwicanyi hashingiwe ku bimenyetso bikurikira:  Kuba Mukarutabana Diane yemeza ko abana be bamubwiye ko Muhawenimana Philomène yiriwe mu cyumba areba film ari kumwe n’umu Tonton, yajya kumureba agasanga yishwe anizwe hakoreshejwe inzitiramibi, kandi icyemezo cya KFL1 cyasuzumye umurambo wa nyakwigendera Muhawenimana Philomène kikagaragaza ko nyakwigendera Muhawenimana Philomène yishwe anizwe;  Kuba Hakizimana Vincent ahakana ko atazi nyakwigendera Muhawenimana Philomène, kandi ko atanazi aho yakoraga Kimironko, nyamara ikimenyetso cyatanzwe na MTN kigaragaza ko bavuganaga kuko ku wa 15/11/2018 bavuganye inshuro ebyiri zose, ndetse ko Hakizimana Vincent yari asanzwe atunze numero ye, aho yari yaramwanditseho ko yitwa Kimironko.  Kuba Hakizimana Vincent ahakana ko atazi nyakwigendera Muhawenimana Philomène, nyamara abatangabuhamya bitwa Mukashyaka Henriette, Mukeshimana François, Niyonkeshabyose David na

Uwayezu Epiphanie bemeje ko ariwe wababwiye iby’urupfu rwe no kujya gutabara, ariko ko atatabaye, ko ahubwo yahisemo guhungira iwabo mu cyaro;  Hari kandi Ayingeneye, umuvandimwe wa nyakwigendera, wemeje ko yabanye na Hakizimana Vincent mu rugo rw’uwitwa Sehene bakora akazi ko mu rugo harimo no kwahira ubwatsi bw’amatungo ye, wahamije ko Hakizimana Vincent yari inshuti ya murumuna we (nyakwigendera), ndetse ko yamuteretaga amwizeza kuzamugira umugore, kandi ko ari nawe wamumubikiye, ariko ko atagiye kumushyingura, ko ahubwo yahisemo guhungira iwabo;  Kuba na none Niyonkeshabyose David wakoraga hafi y’aho nyakwigendera yakoreraga mu rugo rwa Mukarutabana, yemeza ko ku wa 10/12/2018, umunsi nyakwigendera yishweho, yarabonye Hakizimana Vincent ahagera mu gihe cya saa yine za mugitondo akahava saa kumi n’imwe za nimugoroba ahetse agakapu, agahita ahurirana na moto yari ije kumutwara, anemeza ko Hakizimana Vincent yakundaga kuza muri urwo rugo ubwo Mukarutabana yabaga yagiye ku kazi, ndetse ko Niyonkeshabyose David yari asanzwe amuzi kuko yamwerekanye mu basore batanu bari bafashwe bakekwaho kugira uruhare mu rupfu rwa nyakwigendera. [18] Urukiko rw’Ubujurire rurasanga, kuba abatangabuhamya bavuzwe haruguru barimo Ayingeneye na Niyonkeshabyose David bemeza ko Hakizimana Vincent na Muhawenimana Philomène bari basanzwe ari inshuti, kandi Ayingeneye akaba yaremeje ko bavuganaga kuri telefoni nk’uko byashimangiwe n’icyemezo cya MTN cyerekana ko bavuganye inshuro ebyiri ku

1 Rwanda Forensic Laboratory

Page 6

wa 15/11/2018, kandi Niyonkeshabyose David akaba yaremeje ko yiboneye Hakizimana Vincent aza mu rugo rwa Mukarutabana Diane ku wa 10/12/2018, umunsi nyakwigendera Muhawenimana Philomène yishweho, akahava nimugoroba, ndetse akaba yaramwerekanye mu basore batanu bari bafunganwe, no kuba Mukarutabana Diane yaremeje ko abana be bamubwiye ko Muhawenimana Philomène yiriwe mu cyumba areba film ari kumwe n’umu Tonton, yajya kumureba, agasanga yishwe anigishijwe inzitiramibi nk’uko byashimangiwe n’icyemezo cya KFL2 kigaragaza ko Muhawenimana Philomène yishwe anizwe, ari ibimenyetso bihagije bigaragaza ko Hakizimana Vincent yakoze icyaha cy’ubwicanyi yakoreye Muhawenimana Philomène kuko atashoboye kuvuguruza ibyo bimenyetso bimuhamya icyaha nk’uko byemejwe n’Urukiko Rukuru nk’uko byatanzweho umurongo mu rubanza Nº RPAA 00103/2021/CA rwaciwe ku wa 29/09/2022 rwavuzwe haruguru. [19] Urukiko rw’Ubujurire rurasanga ibivugwa na Hakizimana Vincent by’uko atahamwa n’icyaha cy’ubwicanyi kandi atazi Muhawenimana Philomène n’aho yakoraga Kimironko nta shingiro bifite, bigaragara ahubwo ko ari uburyo bwo guhunga icyaha yakoze, kuko nta kimenyetso yatanze kivuguruza ibimenyetso byavuzwe haruguru birimo imvugo z’abatangabuhamya barimo Niyonkeshabyose David na Ayingeneye bemeje ko bari basanzwe ari inshuti banavugana kenshi kuri telefoni nk’uko byashimangiwe n’icyemezo cya MTN ku

buryo Hakizimana Vincent yakundaga kuza kumusura Kimironko nk’uko byemejwe na Niyonkeshabyose David, ndetse ko banirirwanye Kimirongo mu cyumba kwa Mukarutabana Diane, aho basanze umurambo wa nyakwigendera yishwe yanigishijwe inzitiramibu nk’uko byasobanuwe haruguru. [20] Urukiko rw’Ubujurire rurasanga kandi imvugo ya Hakizimana Vincent y’uko atahamwa n’icyaha cy’ubwicanyi hashingiwe ku buhamya bwa Niyonkeshabyose David kubera ko atigeze amushinja ngo anamuvuge mu izina rye nta shingiro ifite, kuko isesengura ry’ubuhamya bwa Niyonkeshabyose David rigaragaza ko bufite ireme kuko ahamya ibyo yiboneye n’amaso ye bijyanye n’uburyo Hakizimana Vincent yazaga gusura nyakwigendera nyirabuja adahari, no ku munsi nyakwigendera yiciweho, ndetse yanamwerekanye mu basore batanu bari bafunganye, bigaragara ko yari asanzwe amuzi nk’uko byasobanuwe haruguru. [21] Urukiko rw’Ubujurire rurasanga na none, kuba hatarakozwe igipimo cya ADN kigaragaza ko ari Hakizimana Vincent wishe nyakwigendera Muhawenimana Philomène, bitatesha agaciro ibindi bimenyetso byavuzwe haruguru bigaragaza ko yakoze icyaha cy’ubwicanyi nk’uko byemejwe n’Urukiko Rukuru, kuko igipimo cya ADN atari kamara, ko ahubwo iyo kiboneka cyari kuba kimwe mu bimenyetso bisuzumwa mu rubanza nk’uko byatanzweho umurongo mu rubanza N° RPAA 0107/07/CS rwaciwe ku wa 11/09/2009 haburana Ubushinjacyaha na Akimanizanye Agnès, aho Urukiko

rw’Ikirenga rwasuzumye ikibazo cy’uko nta raporo ya muganga yabonetse ngo ibe yashingirwaho mu guhamya Akimanizanye Agnès icyaha, maze rutanga umurongo w’uko, rusanga iyo iza kuboneka yari kuba kimwe mu bimenyetso bisuzumwa, ariko ntabwo cyari kuba ari cyo kimenyetso kamara, rumuhamya icyo cyaha rushingiye ku bindi bimenyetso nk’uko biteganywa n’ingingo ya 119 y’Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo.

2. Kumenya niba Hakizimana Vincent yagabanyirizwa ibihano

2 Rwanda Forensic Laboratory cyo ku wa 13/12/2018.

Page 7

[22] Hakizimana Vincent n’umwunganira bavuga ko mu gihe uru Rukiko rubibonye ukundi rukamuhamya icyaha cy’ubwicanyi, rwamugabanyiriza ibihano kuko ari ubwa mbere azaba akoze icyaha, kugira ngo ahabwa amahirwe yo kwikosora no gutekereza ku ngaruka z’icyaha no kungaruka mu muryango nyarwanda mu gihe gikwiriye. [23] Uhagarariye Ubushinjacyaha avuga ko Hakizimana Vincent atagabanyirizwa ibihano kubera uburemere bw’icyaha yakoze.

UKO URUKIKO RUBIBONA [24] Ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya ko “Ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ihinduwe ku buryo bukurikira: « Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15”. [25] Urukiko rw’Ubujurire rurasanga, kuba ari ubwa mbere Hakizimana Vincent akoze icyaha ku buryo buzwi, bikwiye kumubera impamvu nyoroshyacyaha ituma agabanyirizwa igihano, agahanishwa igifungo cy’imyaka makumyabiri n’itanu (25), aho kuba igifungo cya burundu yahawe mbere, bityo imikirize y’urubanza rujuririrwa ikaba ikwiye guhinduka ku birebana n’igihano gusa. III. ICYEMEZO CY’URUKIKO: [26] Rwemeje ko ubujurire bwa Hakizimana Vincent bufite ishingiro ku birebana n’igabanyagihano; [27] Ruvuze ko imikirize y’urubanza Nº RPA 00030/2020/HC/KIG rwaciwe n’Urukiko Rukuru, ku wa 29/09/2023, ihindutse gusa ku birebana n’igihano Hakizimana Vincent ahanishijwe; [28] Ruhanishije Hakizimana Vincent igifungo cy’imyaka makumyabiri n’itanu (25); [29] Rutegetse ko amagarama y’uru rubanza aherera ku Isanduku ya Leta.