CLUB HOUSE LA PALISSE HOTELS Ltd v. MUKERAMIRIMO CONSTRUCTION Ltd

# CLUB HOUSE LA PALISSE HOTELS Ltd v. MUKERAMIRIMO CONSTRUCTION Ltd

- Source: Amategeko - Section: Decisions (Judgements) - Date: 2023-05-29 - Case/document no.: RS/INJUST/RCOM 00018/2022/CA - Collection: Court of Appeal

## Text

## Page 1

CLUB HOUSE LA PALISSE HOTELS Ltd v. MUKERAMIRIMO CONSTRUCTION Ltd [Rwanda URUKIKO RW’UBUJURIRE – RS/INJUST/RCOM 00018/2022/CA (Nyirandabaruta, P.J., Kamere na Ngagi, J.) 29 Gicurasi 2023] Amategeko agenga ubukempurampaka n’ubwunzi mu bibazo by’ubucuruzi – Icyemezo cyafashwe n’ ubukempurampaka – Iyo icyemezo cy’ubukemurampaka cyirengagije amategeko ndemyagihugu mu gihe Umukemurampaka asuzumye ikibazo cyakemutse mu buryo budasubirwaho bwo kwikiranura n’ ubwumvikane, icyo cyemezo gikurwaho – Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi, ingingo ya 47. Amategeko agenga imiburanishirize y’imanza – Inyandikompesha – Amasezerano yo kwikiranura – Ibyemeranyijweho mu masezerano yo kwikiranura yakorewe imbere ya noteri ntabwo byongera kuburanishwa bushya mu gihe impamvu ari zimwe, ikiburanwa ari kimwe n’ababuranyi ari bamwe. Incamake y’ ikibazo : Club House la Palisse Hotels Ltd yatanze ikirego mu Rukiko Rukuru rw’Ubucuruzi, irusaba kuvanaho icyemezo cy’Umukemurampaka ivuga ko cyafashwe mu buryo butubahirije amategeko, ivuga ko yagiranye na sosiyete Mukeramirimo Construction Ltd amasezerano yo gukora imirimo yo gusana inyubako za Club House la Palisse Hotels Ltd , ku kiguzi cya 1.776.963.190 Frw habariwemo imisoro. Nyuma yo kugirana ayo masezerano, yashyizwe umukono wa Noteri, haje kubaho kutumvikana guturutse ku gushinjanya kutayubahiriza, bituma Club House la Palisse Hotels Ltd isesa ayo masezerano. Club House la Palisse Hotels Ltd yasobanuye kandi ko Mukeramirimo Construction Ltd yatanze ikirego mu Bukemurampaka, iregera iseswa ry’amasezerano ridakurikije amategeko, maze mu cyemezo cy’ubukemurampaka, Inteko y’Ubukemurampaka yemeza ko Club House la Palisse Hotels Ltd yaseshe amasezerano mu buryo budakurikije amategeko, bityo inategekwa kwishyura Mukeramirimo Construction Ltd indishyi zitandukanye zishingiye kuri iryo seswa. Club House la Palisse Hotels Ltd yasabye Urukiko Rukuru rw’Ubucuruzi gukuraho icyemezo cy’ubukemurampaka kuko Mukeramirimo Construction Ltd yaregeye abakemurampaka bakemera gufata icyemezo, nyamara ikibazo cyari cyarakemutse mu bwumvikane, aho nyuma yo gusesa ayo masezerano, habayeho amasezerano yo kwikiranura yakorewe imbere ya notaire maze impande zombi zikumvikana ku gaciro k’ibyakozwe, Mukeramirimo Construction Ltd ikemera ko yakiriye amafaranga yose impande zombi zumvikanye, ko kandi ikibazo gikemutse. Sosiyete Quality Construction Ltd na sosiyete Active CM Investement Ltd zagobotse ku bushake muri urwo rubanza. Mukeramirimo Construction Ltd mu kwiregura yabanje gutanga inzitizi yo kutakira ukugoboka ku bushake kwa Quality Construction Ltd na Active CM Investement Ltd, ivuga ko nta nyungu n’ububasha bafite bwo kugoboka, ko kandi batishyuye amagarama.

## Page 2

Urukiko Rukuru rw’Ubucuruzi rwaciye urubanza maze rwemeza ko inzitizi yatanzwe na Mukeramirimo Construction Ltd, yo kutakira ukugoboka ku bushake kwa Quality ConstructioN Ltd na Active CM Investment Ltd ifite ishingiro, bityo ko ikirego cyatanzwe na Club House La Palisse Hotels Ltd, gisaba kuvanaho icyemezo cy’umukemurampaka nta shingiro gifite, maze rwemeza ukutakira ukugoboka ku bushake kwa Quality Construction Ltd muri uru rubanza, kubera kudatanga igarama, ibura ry’ububasha ndetse n’inyungu, no kutakira ukugoboka ku bushake kwa Active CM Investment Ltd, kubera ibura ry’ububasha ndetse n’inyungu, bityo ko nta mpamvu ihari yo kuvanaho icyemezo cy’umukemurampaka. Club House la Palisse Hotels Ltd yatakambiye Perezida w’Urukiko rw’Ubujurire, isaba ko urubanza RCOM 00034/2022/HCC rusubirishwamo ku mpamvu z’akarengane. Urukiko rwabanje gusuzuma ikibazo cyo kumenya niba Quality Construction Ltd na Active CM Investment Ltd batemerewe kugoboka ku bushake mu rubanza rusubirwamo bakwemererwa kuba ababuranyi muri uru rubanza, maze rusanga kuba mu rubanza rusubirishwamo ku mpamvu z’akarengane bataremerewe ku rugobokamo ku bushake, bivuze ko batarubayemo ababuranyi. Hanasuzumwe inzitizi y’iburabubasha bw’Urukiko rw’Ubujurire yatanzwe na Mukeramirimo Construction Ltd ishingiye ku kuba ibirego by’imanza z’ubukemurampaka bidashobora gusubirishwamo ku mpamvu z’akarengane, maze uru Rukiko rwemeza ko ikirego cyo gusubirishamo urubanza ku mpamvu z’akarengane kiri mu bubasha bwarwo. Club House la Palisse Hotels Ltd yisobanura ivuga ko akarengane yagiriwe gashingiye ku kuba Urukiko Rukuru rw’Ubucuruzi rwaremeje ko icyemezo cy’ubukemurampaka kigumaho kandi cyarafashwe mu buryo bunyuranyije n’amategeko kuko kuba impande zombi zaragiranye amasezerano yo kwikiranura yaramaze kuba itegeko, Ubukemurampaka butagombaga kuyarengaho ngo bufate icyemezo, bityo ko Urukiko Rukuru rw’Ubucuruzi rwagombaga gutesha agaciro icyemezo cy’ubukemurampaka kuko cyafashwe mu buryo budakurikije amategeko. Mukeramirimo Construction Ltd yiregura ivuga ko Club House la Palisse Hotels Ltd igomba kugaragaza akarengane yagiriwe ishingiye ku rubanza rwaciwe n’Urukiko Rukuru rw’Ubucuruzi aho gushingira ku cyemezo cy’ubukemurampaka. Bavuga kandi ko Urukiko Rukuru rw’Ubucuruzi rwasuzumwe ibyo Club House la Palisse Hotels Ltd yaregeye rugasanga ntaho bihuriye n’ibivugwa muri iyo ngingo ya 47, ko kuba rero itarishimiye icyemezo cyafashwe n’Ubukemurampaka atari impamvu ituma icyo cyemezo giteshwa agaciro. Incamake y icyemezo: Amasezerano yo kwikiranura afite agaciro k’urubanza rwaciwe ku rwego rwa nyuma rwabaye itegeko kuko itegeko riteganya ko bene ayo masezerano ari inyandikompesha. Ibyafashweho icyemezo mu manza zaciwe ku rwego rwa nyuma n’ibyemeranyijweho mu masezerano yo kwikiranura yakorewe imbere ya noteri ntabwo byongera kuburanishwa bushya mu gihe impamvu ari zimwe, ikiburanwa ari kimwe n’ababuranyi ari bamwe. Bityo Inteko y’ubukemurampaka yirengagije amategeko ndemyagihugu kuko yasuzumye ikibazo cyakemutse mu buryo budasubirwaho bwo kwikiranura n’ ubwumvikane, kubera ibyo icyemezo yafashe gikuweho.

## Page 3

Icyemezo cy’Ubukemurampaka kivanweho. Amategeko yashingiweho: Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, n’ingingo ya 241, Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi, ingingo ya 47. Nta manza zifashishijwe. Urubanza I. IMITERERE Y’URUBANZA [1] Uru rubanza rukomoka ku yatanze mu Rukiko Rukuru rw’Ubucuruzi, irusaba kuvanaho icyemezo cy’Umukemurampaka KIAC Arbitration N° 2020/172 cyo ku wa 16/05/2022 kuko cyafashwe mu buryo butubahirije amategeko. Club House la Palisse Hotels Ltd yasobanuye ko mu izina ry'Umuyobozi wayo, Mukezangabo Augustin, ku wa 15/12/2020, yagiranye na Mukeramirimo Construction Ltd amasezerano yo gukora imirimo yo gusana inyubako za Club House la Palisse Hotels Ltd , ku kiguzi cya 1.776.963.190 Frw habariwemo imisoro. Nyuma yo kugirana ayo masezerano, yashyizwe umukono wa Noteri, haje kubaho kutumvikana guturutse ku gushinjanya kutayubahiriza, maze ku wa 20/04/2021, Club House la Palisse Hotels Ltd yandikira Mukeramirimo Construction Ltd , isesa ayo masezerano. [2] Club House la Palisse Hotels Ltd yasobanuye kandi ko Mukeramirimo Construction Ltd yatanze ikirego mu Bukemurampaka, iregera iseswa ry’amasezerano ridakurikije amategeko, maze mu cyemezo cy’ubukemurampaka KIAC Arbitration No: 2020/172 cyo ku wa 16/05/2022, Inteko y’Ubukemurampaka yemeza ko Club House la Palisse Hotels Ltd yaseshe amasezerano mu buryo budakurikije amategeko, bityo inategekwa kwishyura Mukeramirimo Construction Ltd indishyi zitandukanye zishingiye kuri iryo seswa. [3] Club House la Palisse Hotels Ltd yasabye Urukiko Rukuru rw’Ubucuruzi gukuraho icyemezo cy’ubukemurampaka kuko Mukeramirimo Construction Ltd yaregeye abakemurampaka bakemera gufata icyemezo, nyamara ikibazo cyari cyarakemutse mu bwumvikane, aho nyuma yo gusesa ayo masezerano, habayeho amasezerano yo kwikiranura, impande zombi zikumvikana ku gaciro k’ibyakozwe na Mukeramirimo Construction Ltd, ikemera ko yakiriye amafaranga yose impande zombi zumvikanye, ko kandi ikibazo gikemutse, nta kindi Mukeramirimo Construction Ltd ibaza Club House la Palisse Hotels Ltd Active CM Investment Ltd na Active CM Investment Ltd zagobotse ku bushake muri urwo rubanza. [4] Mukeramirimo Construction Ltd mu kwiregura yabanje gutanga inzitizi yo kutakira ukugoboka ku bushake kwa Quality Construction Ltd na Active CM Investment Ltd , kuko nta nyungu n’ububasha bafite bwo kugoboka, ko kandi batishyuye amagarama. Nyuma y’izi nzitizi, Mukeramirimo Construction Ltd yireguye ku kirego cya Club House la Palisse Hotels Ltd, isobanura ko ibyo iregera mu Rukiko, ishingira ku mpamvu z’urubanza mu mizi zasuzumwe n’Inteko y’ubukemurampaka nk’aho yifuza ko urubanza rwakongera kuburanishwa mu mizi

## Page 4

yarwo imbere y’Urukiko, kandi bitemewe; isoza isaba ko Club House la Palisse Hotels Ltd itegekwa kuyiha amafaranga y'ikurikiranarubanza n'igihembo cya Avoka. [5] Ku wa 28/10/2022, Urukiko Rukuru rw’Ubucuruzi rwaciye urubanza RCOM 00034/2022/HCC, rwemeza ko inzitizi yatanzwe na Mukeramirimo Construction Ltd yo kutakira ukugoboka ku bushake kwa Quality Construction Ltd na Active CM Investment Ltd ifite ishingiro, ko ikirego cyatanzwe na Club House la Palisse Hotels Ltd, gisaba kuvanaho icyemezo cy’umukemurampaka KIAC Arbitration no: 2020/172 cyo ku wa 16/05/2022 n’icyo ku wa 27/06/2022, nta shingiro gifite. Rwemeza ukutakira ukugoboka ku bushake kwa Quality Construction Ltd muri uru rubanza, kubera kudatanga igarama, ibura ry’ububasha ndetse n’inyungu, no kutakira ukugoboka ku bushake kwa Active CM Investment Ltd kubera ibura ry’ububasha ndetse n’inyungu. Rutegeka kandi ko nta mpamvu ihari yo kuvanaho icyemezo cy’umukemurampaka KIAC Arbitration nº 2020/172 cyo ku wa 16/05/2022 n’icyo ku wa 27/06/2022, bityo ko Club House la Palisse Hotels Ltd igomba guha Mukeramirimo Construction Ltd 1.000.000 Frw y’ikurikiranarubanza n’igihembo cya Avoka. [6] Club House la Palisse Hotels Ltd yatakambiye Perezida w’Urukiko rw’Ubujurire, isaba ko urubanza RCOM 00034/2022/HCC rusubirishwamo ku mpamvu z’akarengane. Nyuma yo gusuzuma ubusabe bwe, Perezida w’Urukiko rw’Ubujurire yandikiye Perezida w’Urukiko rw’Ikirenga asaba ko urwo rubanza rusubirwamo, maze mu cyemezo cye Nº 282/CJ/2022, Perezida w’Urukiko rw’Ikirenga yemeza ko urwo rubanza rwoherezwa mu Bwanditsi bw’Urukiko rw’Ubujurire kugira ngo ruzongere ruburanishwe, ikirego cyandikwa kuri RS/INJUST/RCOM 00018/2022/CA. [7] Urubanza rwaburanishijwe mu ruhame ku wa 17/04/2023, Club House la Palisse Hotels Ltd ihagarariwe na Me Nkundabarashi Moise, Me Shema Gakuba Charles na Me Sebukonoke Innocent, Mukeramirimo Construction Ltd ihagarariwe na Me Turatsinze Emmanuel, Me Mutabazi Celestin na Me Uwizeyimana Jean Baptiste, naho Quality ConstructioN Ltd na Active CM Investment Ltd zihagarariwe na Me Bangamwabo Octave. [8] Urukiko rwabanje gusuzuma ikibazo cyo kumenya niba Quality Construction Ltd na Active CM Investment Ltd batemerewe kugoboka ku bushake mu rubanza rusubirwamo bakwemererwa kuba ababuranyi muri uru rubanza, maze rufatiye icyemezo mu ntebe, rusanga kuba mu rubanza rusubirishwamo ku mpamvu z’akarengane bataremerewe ku rugobokamo ku bushake, bivuze ko batarubayemo ababuranyi. Rwemeza ko ibyo uzihagarariye avuga ko zarubayemo ababuranyi ashingiye ku ngingo 63 y’Itegeko nº 30/2018 ryo ku wa 2/06/2018 rigena ububasha bw’inkiko1, nta shingiro bifite; ko urubanza rukomeza zitarurimo. Hanasuzumwe inzitizi y’iburabubasha bw’Urukiko rw’Ubujurire yatanzwe na Mukeramirimo Construction Ltd ishingiye ku kuba ibirego by’imanza z’ubukemurampaka bidashobora gusubirishwamo ku mpamvu z’akarengane, maze mu rubanza rubanziriza urundi rwasomwe ku 1 Iyo Urukiko rw’Ikirenga cyangwa urundi rukiko Perezida w’Urukiko rw’Ikirenga agena rushyikirijwe urubanza rusabirwa gusubirwamo ku mpamvu z’akarengane, rurusuzuma mu mizi bundi bushya abarubayemo ababuranyi bose bahamagajwe.

## Page 5

wa 27/04/2023, uru Rukiko rwemeza ko ikirego cyo gusubirishamo urubanza ku mpamvu z’akarengane cyatanzwe na Club House la Palisse Hotels Ltd kiri mu bubasha bwarwo. [9] Urubanza rwongeye kuburanishwa mu ruhame ku wa 10/05/2023, Club House la Palisse Hotels Ltd ihagarariwe nka mbere, naho Mukeramirimo Construction Ltd ihagarariwe na Me Mutabazi Celestin na Me Turatsinze Emmanuel, hasuzumwa ibibazo byumvikanyweho bijyanye no kumenya niba Urukiko Rukuru rw’Ubucuruzi rwaragombaga kuvanaho icyemezo cy’ubukemurampaka KIAC Arbitration N° 2020/172 n’icyo kumenya niba amafaranga y’ikurikiranarubanza n’igihembo cya Avoka asabwa muri uru rubanza afite ishingiro. II.IBIBAZO BIGIZE URUBANZA N’ISESENGURA RYABYO

1. Kumenya niba Urukiko Rukuru rw’Ubucuruzi rwaragombaga kuvanaho icyemezo cy’Ubukemurampaka KIAC Arbitration N° 2020/172 [10] Abahagarariye Club House la Palisse Hotels Ltd bavuga ko akarengane uwo bahagarariye yagiriwe gashingiye ku kuba Urukiko Rukuru rw’Ubucuruzi rwaremeje ko icyemezo cy’ubukemurampaka kigumaho kandi cyarafashwe mu buryo bunyuranyije n’amategeko. Basobanura ko urwo Rukiko rwirengagije ingingo ya 47, agace 2, point b, y’Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi iteganya ko Urukiko rusuzuma niba icyemezo cy’ubukemurampaka cyarafashwe mu buryo bukurikije amategeko, ko kuba rero impande zombi zaragiranye amasezerano yo kwikiranura ku wa 05/05/2021 nk’uko byari bikubiye mu ngingo ya 20, agace ka 1, y’amasezerano y’imikoranire yabaye hagati ya Club House la Palisse Hotels Ltd na Mukeramirimo Construction Ltd Ubukemurampaka butagombaga kuyarengaho ngo bufate icyemezo, bityo Urukiko Rukuru rw’Ubucuruzi rwagombaga gutesha agaciro icyemezo cy’ubukemurampaka kuko cyafashwe mu buryo budakurikije amategeko. [11] Bavuga kandi ko kumutwe (titre) w’inyandiko yo kumvikana hagaragaramo ibyo impande zombi zagombaga kumvikanaho harimo ibijyanye no gusesa amasezerano n’ibijyanye n’imirimo yakozwe n’ubwishyu bwayo, ko kandi Mukeramirimo Construction Ltd yemeye ko ihawe amafaranga yose yakoreye, irabisinyira, bakaba basanga rero niba hari ibitarumvikanyweho mu masezerano y’ubwumvikane nk’uko ubukemurampaka bwabivuze bwaragombaga kwemeza ko bisubira mu bwumvikane aho kubifataho icyemezo, bityo Urukiko Rukuru rw’Ubucuruzi rwagombaga gutesha agaciro icyo cyemezo cy’ubukemurampaka kuko kidakurikije amategeko, ariko ko mu gika cya 23 cy’urubanza rusubirwamo RCOM 00034/2022/HCC, Urukiko Rukuru rw’Ubucuruzi rwemeje ko ibivugwa na Club House la Palisse Hotels Ltd nta na kimwe gifite ishingiro mu biteganywa n’ingingo ya 47 y’Itegeko ryerekeye ubukemurampaka ryibukijwe haruguru. [12] Basobanura ko Club House la Palisse Hotels Ltd ishingiye ku masezerano yo kwikiranura yo ku wa 05/05/2021, yatanze inzitizi yo kutakira ikirego cya Mukeramirimo Construction Ltd kuko ayo masezerano yari yaramaze kuba itegeko ariko Umukemurampaka ntiyayitaho. Basobanura ko ingingo ya 241 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko inyandiko yo kwikiranura ifite agaciro k’urubanza rwabaye itegeko, ko kandi

## Page 6

ingingo ya 14 y’Itegeko Nº 22/2018 rimaze kuvugwa, iteganya ko urubanza rwaciwe ku rwego rwa nyuma rudashobora kongera kuburanishwa bundi bushya ku mpamvu zimwe no ku kiburanwa kimwe hagati y’ababuranyi bamwe baburana ikirego kimwe. [13] Basobanura ko umutwe w’inyandiko yo kwikiranura yo ku wa 05/05/2021 (A19 na A 20), urimo ibice bibiri bikurikira: Agreement on contract termination na Valuation report on work done, ko igice cyiswe contract termination, gikubiyemo ibijyanye no gusuzuma niba amasezerano yarasheshwe mu buryo bunyuranyije n’amategeko, naho ku gice cyiswe valuation report on work done, hakabamo ibijyanye no kugena agaciro k’ibyakozwe, bityo bikishyurwa, ko impande zombi zemeranyije ko nta kindi Club House la Palisse Hotels Ltd igomba Mukeramirimo Construction Ltd ndetse ko iyi na yo ntacyo igomba Club House la Palisse Hotels Ltd (no autstanding amount remaining), bikaba bivuze ko uko kwikiranura kwarebaga igice cyo gusesa amasezerano no gukemura ubwishyu bw’ibikorwa Mukeramirimo Construction Ltd yakoze, bityo ko byabaye itegeko ku mpande zombi ku buryo Mukeramirimo Construction Ltd itasubira inyuma ngo yongere itange ikirego ishakisha ubwishyu yamaze guhabwa, kuko byaba ari uburiganya mu rwego rw’amategeko. [14] Basobanura kandi ko Club House la Palisse Hotels Ltd ishingiye ku ngingo ya 20 y’amasezerano yo ku wa 15/12/2020, irebana n’impamvu zishobora gutuma amasezerano aseswa n’uburyo ashobora guseswamo, yeretse Urukiko Rukuru rw’Ubucuruzi ko Mukeramirimo Construction Ltd yananiwe kubahiriza amasezerano, kubera ibibazo bikomoka ku kutubahiriza amasezerano byari bimaze kugaragara, byo kutishyura abayigemuriraga ibikoresho, ibyo bikaba byaragaragazwaga n’inyandiko z’abantu n’amasosiyete zandikiwe Mukeramirimo Construction Ltd yishyuzwa ntiyishyure, ariko ntirubihe agaciro kandi ari indemyagihugu, kuko urubanza rwamaze kuba Itegeko rutari kongera kuburanishwa bundi bushya nk’aho nta byemeranyijweho, nk’uko n’umukemurampaka yabigaragarijwe ariko na we ntabihe ishingiro. Ko yanarweretse ko uko kutubahiriza amasezerano byakomezaga gutera Club House la Palisse Hotels Ltd igihombo, bityo ko ari byo byabaye intandaro yatumye ifata icyemezo cyo gusesa amasezerano. [15] Bakomeza basobanura ko nyuma yo gusesa amasezerano, nk’uko byari biteganyijwe mu ngingo ya 20 mu gace kayo ka (i), aho ivuga ko mbere yo kuregera Urukiko rubifitiye ububasha, impande zombi zibanza kugerageza gukemura ikibazo mu nzira z’ubwumvikane, impande zombi zakoze amasezerano yo kwikiranura, ariko Umukemurampaka avuga ko ukwikiranura kwabaye ku gice kimwe ngo nubwo atagisobanuye neza, hanyuma mu guca urubanza mu mizi akavuga ko Club House la Palisse Hotels Ltd yasheshe amasezerano mu buryo bunyuranyije n’amategeko ndetse n’amasezerano, ibyo bikaba byumvikana ko mu cyemezo cye Umukemurampaka ku birebana n’inzitizi, icyo yavuze kitafashweho icyemezo ari termination of contract, ko niba koko yarasanze kitarafashweho icyemezo yagombaga gusaba ababuranyi kucyumvikanaho nk’uko babyemeranyijwe mu masezerano aho kubifataho icyemezo kandi hari amasezerano yo kwikiranura impande zombi zagiranye. [16] Bakomeza bavuga ko Club House la Palisse Hotels Ltd yasabye Urukiko Rukuru rw’Ubucuruzi gusuzuma inzitizi yo kutakira ikirego kuko yari yarafashweho umwanzuro n’umukemurampaka mu buryo butayishimishije, maze ishingiye ku mategeko ikarusaba gusuzuma niba hari ikibazo kitakemuwe mu bwumvikane, cyaba gihari rugategeka ko kiganirwaho kugira ngo impande zombi zigerageze kucyikiranuraho nk’uko ingingo ya 20, agace kayo ka (i), ibiteganya, ariko rukabyirengagiza, kandi rwari rwagaragarijwe ko

## Page 7

umukemurampaka atashatse kumva ibisobanuro byayo neza bigaragaza ishingiro ry’iyo nzitizi, aho kubyumva akavuga amagambo mabi nk’uko byasobanuwe mu mwanzuro ujuririra icyemezo cy’umukemurampaka. Basaba ko iyo audio y’iburanisha yazumvwa kugira ngo hagaragazwe uburyo yaburanishaga, ngo kuko uwari uyihagarariye yajyaga impaka n’umukemurampaka yifuzaga gusobanura iyo nzitizi, yabona yimwe ijambo akicecekera ngo bidafatwa nko guterana amagambo. [17] Bakomeza bavuga ko kuba Urukiko Rukuru rutarahaye agaciro iyo nzitizi, ari ho akarengane Club House la Palisse Hotels Ltd yagiriwe mu rubanza No RCOM 00034/2022/HC gashingiye, asaba ko uru Rukiko rwazayisuzuma maze mukemeza ko kuri iyi ngingo irebana n’inzitizi yarenganyijwe, kuko kuba impande zombi zari zaramaze kwikiranura, bitashobokaga ko hagira uruhande rubirengaho ngo rujye gutanga ikirego. Bityo kuba umukemurampaka yari yagaragarijwe ko nta bubasha yari afite bwo kuburanisha impaka zari hagati ya Club House la Palisse Hotels Ltd na Mukeramirimo Construction Ltd, ariko akabirengaho agafata icyemezo cyuko abufite, ari ukwica amategeko kuko ikibazo cy’ububasha ari indemyagihugu. [18] Basobanura kandi ko ku birebana n’uburyo amasezerano yasheshwe, ku murongo wa nyuma kuri A19 page ya 1, havuga ko impande zombi zemeranyije ko Mukeramirimo Construction Ltd yakiriye amafaranaga y’imirimo yakozwe kandi ko nta kindi ikurikiranaho urundi ruhande, kandi ko impande zombi zabisinyiye, ndetse ko no mu gace kiswe ii b, amasezerano yateganyaga ko iyo habayeho kwica amasezerano kwisubiyemo, urundi ruhande rushobora gusesa amasezerano, ko ibyo ari byo byatumye Club House la Palisse Hotels Ltd isesa amasezerano, ariko ko Umukemurampaka yavuze ko impande zombi zitigeze zumvikana ku ngingo ebyiri, ko ikijyanye n’amasezerano kitigeze cyumvikanwaho, ko cyagombaga gusubira mu bwumvikane ariko ko yihaye ububasha bwo kukiburanishaho kitaragiye mu bwumvikane, n’Urukiko rukabibona rutyo bikaba byarayirenganyije. Ko kuba Umukemurampaka yaremeye ko habaye ubwumvikane, ariko akavuga ko afite ububasha bwo kuburanisha, ari ho akarengane kari. [19] Basaba Urukiko rw’Ubujurire kuzakosora iyo myumvire y’Urukiko Rukuru rw’Ubucuruzi rukarenganura Club House la Palisse Hotels Ltd, maze rukemeza ko kuba impande zombi zari zamaze kwikiranura, zikumvikana ku byo yishyura igahita yishyura nk’uko byasobanuwe haruguru, ikirego kitagombaga kwakirwa haba muri KIAC no mu Rukiko, kuko inyandiko yo kwikiranura yo ku wa 05/05/2021 yari yamaze kuba Itegeko, ibyari biyikubiyemo bikaba byari byaramaze kuba Itegeko nk’uko biteganywa n’ingingo ya 241 y’Itegeko Nº 22/2018 ryo ku wa 29/04/2018 ryavuzwe haruguru. [20] Bavuga na none ko iyo urebye amasezerano yo kwikiranura, usanga icyemezo cy’ubukemurampaka cyaragombaga guteshwa agaciro hashingiwe ku ngingo ya 47 .1. d na 2.b, kandi ko ibyo bihuzwa n’inshingano umucamanza ahabwa n’ingingo ya 82, igika cya 4 n’icya 5 y’Itegeko no 30/2018 ryo ku wa 02/06/2018 rigena ububasha bw’Inkiko. [21] Abahagarariye Mukeramirimo Construction Ltd bavuga ko ingingo ya 47 y’Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi ariyo igaragaza igihe icyemezo cy’ubukemurampaka gikurwaho n’Urukiko Rukuru rw’Ubucuruzi, ko Club House la Palisse Hotels Ltd igomba kugaragaza akarengane yagiriwe ishingiye ku rubanza rwaciwe n’Urukiko Rukuru rw’Ubucuruzi aho gushingira ku cyemezo cy’ubukemurampka kuko urubanza arirwo yasubirishijemo ku

mpamvu

## Page 8

z’akarengane. Bavuga kandi ko Urukiko Rukuru rw’Ubucuruzi rwasuzumwe ibyo Club House la Palisse Hotels Ltd yaregeye rugasanga ntaho bihuriye n’ibivugwa muri iyo ngingo ya 47, ko kuba rero itarishimiye icyemezo cyafashwe n’Ubukemurampaka atari impamvu ituma icyo cyemezo giteshwa agaciro. [22] Basobanura ko mu gatabo gakubiyemo iby’ingenzi bigomba kwitabwaho mu gusaba ko imanza zisubirishwamo ku mpamvu z’akarengane, cyane cyane ku rupapuro rwa 44, Urukiko rw’Ikirenga rwagize ruti: “bikunze kugaragara ko urega avuga mu kirego kimwe imanza ebyiri icyarimwe; ni ukuvuga urwafashe icyemezo cyo kutakira ubujurire, n’urwaciwe mu mizi (urwajuririrwaga), yajya gusobanura akarengane avuga ko yagiriwe, akivugira ku rwaciwe mu mizi (…) ingaruka zishobora no kuba kutagira ishingiro ku kirego cye, mu gihe aregeye akarengane mu rubanza runaka, yajya kugasobanura akavuga ibireba urundi rubanza ataregeye.” Ko uwo ari na wo murongo wafashwe mu rubanza RS / INJUST / RCO M 00005/2020/SC rwa BPR ATLAS MARA Plc na NKUSI Evariste, rwaciwe ku wa 27/11/2020. [23] Basobanura kandi ko ingingo enye Club House la Palisse Hotels Ltd yaregeye mu Rukiko Rukuru rw’Ubucuruzi zidahura n’ibitanywa n’ingingo ya 47 y’itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi, ku buryo byashingirwaho hateshwa agaciro icyemezo cy’ubukemurampaka, cyane ko itanagaragaza inenge iri mu rubanza RCOM 00034/2022/HCC isubirishamo ku mpamvu z’akarengane. [24] Bakomeza basobanura ko nta kindi Club House la Palisse Hotels Ltd igaragaza uretse kuvuga ko itishimiye icyemezo cy’Ubukemurampaka, ishingiye ku byateganyijwe mu masezerano yagiranye na Mukeramirimo Construction Ltd, bityo ikagaragaza ko iyi itubahirije amasezerano bagiranye nk’aho iri mu bujuririre busanzwe mu manza zisanzwe, hashingiwe ku biteganyijwe n’ingingo ya 147 y’Itegeko Nº 22/2018 ryo ku wa 29/04/2018 ryavuzwe haruguru, ko rero kuba itagaragaza akarengane yagiriwe mu rubanza RCOM 00034/2022/HCC yasabiye gusubirwamo ku mpamvu z’akarengane, iyi ngingo idakwiye guhabwa ishingiro. [25] Bashingiye kandi ku ngingo ya 47 y’Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi, no ku murongo wafashwe mu rubanza RS / INJUST / RCOM 00005 / 2020 / SC rwa BPR ATLAS MARA Plc na Nkusi Evariste rwaciwe ku wa 27/11/2020, bavuga ko nta karengane kari mu rubanza RCOM 00034/2022/HCC. UKO URUKIKO RUBIBONA [26] Impaka kuri iyi ngingo zishingiye ku kumenya niba Urukiko Rukuru rw’Ubucuruzi rwaragombaga gukuraho icyemezo cy’umukemurampaka KIAC Arbitration no: 2020/172 kubera ko ukwikiranura kw’impande zombi kwagize agaciro k’urubanza rwabaye itegeko, Ubukemurampaka bukaba butaragombaga kwakira ikirego cya Mukeramirimo Construction Ltd Ingingo ya 63 y’Itegeko N° 30/2018 ryo ku wa 02/06/2018 rigena ububasha bw’inkiko iteganya ibikurikira “Iyo Urukiko rw’Ikirenga cyangwa urundi rukiko Perezida w’Urukiko rw’Ikirenga agena rushyikirijwe urubanza rusabirwa gusubirwamo ku mpamvu z’akarengane, rurusuzuma mu mizi bundi bushya abarubayemo ababuranyi bose bahamagajwe.”

## Page 9

[27] Ingingo ya 47 y’Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi iteganya ibikurikira: “Imyanzuro yafashwe hakoreshejwe ubukemurampaka ishobora kuvanwaho n’urukiko ruvugwa mu ngingo ya 8 y’iri tegeko igihe gusa: 1° (…); 2° urukiko ruramutse rusanze ko: a) ikiburanwa kidashobora gukemurwa hakoreshejwe ubukemurampaka hakurikijwe amategeko y’u Rwanda; b) urubanza rwaciwe runyuranye n’amategeko ndemyagihugu ya Repubulika y’u Rwanda.” [28] Urukiko rurasanga ingingo ya 47 imaze kuvugwa haruguru, yumvikanisha ko umuburanyi utishimiye icyemezo cyafashwe n’Ubukemurampaka aregera Urukiko rubifitiye ububasha kugira ngo ruvaneho icyo cyemezo, amaze kugaragaza impamvu ashingiraho mu ziteganywa n’iyi ngingo yatuma icyo cyemezo kivanwaho. [29] Ku birebana n’uru rubanza, dosiye igaragaramo amasezerano y’imikoranire yo ku wa 15/12/2020, yabaye hagati ya Club House la Palisse Hotels Ltd na Mukeramirimo Construction Ltd mu ngingo ya 20 (1), impande zombi zumvikanye ko ikibazo cyavuka muri ayo masezerano impande zombi zabanza kugikemura mu bwumvikane mbere yo kuregera Ubukemurampaka. Igaragararamo kandi amasezerano yo kwikiranura yo ku wa 05/05/2021 yiswe “Agreement on contract termination and valuation report on work done”, yabaye hagati ya Club House la Palisse Hotels Ltd na Mukeramirimo Construction Ltd, agaragaza ko agaciro k’ibyakozwe ari 175.896.285 Frw na 6.339.184 Frw, kandi ko Club House la Palisse Hotels Ltd, yishyura Mukeramirimo Construction Ltd havanywemo 40.926.250 Frw ya avanse yahawe. Agaragaza kandi ko Mukeramirimo Construction Ltd yakiriye ubwishyu bwose, ko kandi nta mafaranga asigaye igomba kwishyurwa2. [30] Dosiye y’urubanza igaragaza na none ko mu bukemurampaka Club House la Palisse Hotels Ltd yagaragaje ko hari amasezerano yo kwikiranura yabaye hagati y’impande zombi nk’uko bigaragara ku rupapuro rwa 20, aho Ubukemurampaka bwasuzumye ikibazo kijyanye no kumenya niba hari amasezerano yo kwikiranura yabaye hagati y’impande zombi3, maze ubukemurampaka bwemeza ko ayo masezerano yo kwikiranura yabayeho ariko ko impande zombi zitikiranuye ku bibazo byose zifitanye. [31] Imikirize y’urubanza RCOM 00034/2022/HCC rusubirwamo ku mpamvu z’akarengane igaragaza ko, Urukiko Rukuru rw’Ubucuruzi mu gusuzuma niba Umukemurampaka yarirengajije inzitizi yari yatanzwe na Club House la Palisse Hotels Ltd, aho yari yasabye Umukemurampaka kudasuzuma ikirego kuko habayeho amasezerano yo kwikiranura, rwavuze ko iyi mpamvu y’ubujurire, ntaho ihuriye n’iziteganyijwe mu ngingo ya 47 y’itegeko nº005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi, ikaba itashingirwaho ngo icyemezo cy’Ubukemurampaka giteshwe agaciro. 2 MUKERAMIRIMO Construction Ltd acknowledge the reception of full payment and no outstanding amount remaining 3 Determining whether there has been an amicable Settlemnt between parties.

## Page 10

[32] Mu rwego rwo gusubiza iki kibazo, Urukiko rurasuzuma agaciro k’amasezerano yo kwikiranura yabaye hagati ya Club House la Palisse Hotels Ltd na Mukeramirimo Construction Ltd n’ingaruka zayo ku iyakirwa ry’ikirego cya Mukeramirimo Construction Ltd [33] Ingingo ya 241, igika cya 1, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi isobanura inyandikompesha icyo ari cyo. Mu gika cya 2, igatanga urutonde rw’izo nyandiko harimo n’amasezerano yo kwikiranura yakorewe imbere ya noteri (...). [34] Ingingo ya 14 y’Itegeko No 22/2018 ryo ku wa 29/04/2018 ryavuzwe haruguru, yo iteganya ko urubanza rwaciwe ku rwego rwa nyuma rudashobora kongera kuburanishwa bundi bushya ku mpamvu zimwe no ku kiburanwa kimwe hagati y’ababuranyi bamwe baburana ikirego kimwe. [35] Urukiko rusomeye hamwe izi ngingo zombi rusanga zumvikanisha ko inyandikompesha ari inyandiko zishingiye ku byemezo by’inzego zibifitiye ububasha cyangwa byemeranyijweho n’abo bireba zishobora kurangizwa ku gahato, ko muri zo harimo imanza zaciwe n’inkiko ndetse n’amasezerano yo kwikiranura yakorewe imbere ya noteri. Zumvikanisha kandi ko izo nyandiko zifite agaciro k’imanza zaciwe ku rwego rwa nyuma kuko ari zo zishobora kurangizwa ku gahato, kandi ko urubanza rwaciwe ku rwego rwa nyuma rudashobora kongera kuburanishwa ku mpamvu zimwe no ku kiburanwa kimwe hagati y’ababuranyi bamwe baburana ikirego kimwe. Mu yandi magambo ibyafashweho icyemezo mu manza zaciwe ku rwego rwa nyuma n’ibyemeranyijweho mu masezerano yo kwikiranura yakorewe imbere ya noteri ntabwo byongera kuburanishwa bushya mu gihe impamvu ari zimwe, ikiburanwa ari kimwe n’ababuranyi ari bamwe. [36] Nk’uko byagaragajwe haruguru, ku wa 05/05/2021, Club House la Palisse Hotels Ltd na Mukeramirimo Construction Ltd bagiranye amasezerano yo kwikiranura abera imbere ya noteri, Urukiko rurasanga ayo masezerano afite agaciro k’urubanza rwaciwe ku rwego rwa nyuma kuko itegeko riteganya ko bene ayo masezerano ari inyandikompesha, ni ukuvuga afite agaciro k’urubanza rwabaye itegeko. [37] Urukiko rurasanga Urukiko Rukuru rw’Ubucuruzi rwarirengagije ko Umukemurampaka yafashe icyemezo ku masezerano yabaye hagati ya Club House la Palisse Hotels Ltd na Mukeramirimo Construction Ltd ku wa 15/12/2020, kandi impande zombi zarakemuye ikibazo zari zifitanye mu masezerano yo kwikiranura yakorewe imbere ya noteri ku wa 05/05/2021, ndetse n’ibiteganyijwe mu ngingo ya 20 agace (i) y’amasezerano impande zombi zagiranye ku wa 15/12/2020, iteganya ko mbere yo kuregera Urukiko rubifitiye ububasha impande zombi zigomba kubanza kugerageza gukemura ikibazo mu nzira y’ubwumvikane, n’ingingo ya 241, agace 6, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko amasezerano yo kwikiranura yakorewe imbere ya noteri ari inyandikompesha, ni ukuvuga ari itegeko kubayagiranye, akaba ari nta rundi rubanza cyangwa ubukemurampaka bwashobokaga gukorwa nyuma yo kwikiranura kw’impande zombi. Kuba rero, abakemurampaka barabirenzeho bagafata icyemezo birengagije ibyo uhagarariye Club House la Palisse Hotels Ltd yagaragaje ko ikibazo cyakemutse ku buryo budasubirwaho, Urukiko rurasanga aya ari amakosa akomeye yagombaga gutuma Urukiko Rukuru rw’Ubucuruzi rubona ko icyo cyemezo cy’ubukemurampaka

## Page 11

cyirengagije amategeko ndemyagihugu kuko Ubukemurampaka bwasuzumye ikibazo cyakemutse mu buryo budasubirwaho. Bityo rero uru Rukiko rushingiye ku biteganywa mu ngingo ya 47, agace ka 2.b y’itegeko rigenga Ubukemurampaka ryavuzwe haruguru, rurasanga icyemezo cy’Ubukemurampaka kigomba kuvaho. [38] Ku bivugwa n’abahagarariye Mukeramirimo Construction Ltd ko Club House la Palisse Hotels Ltd itagaragaza icyo yarenganyijweho n’ubanza rwaciwe n’Urukiko Rukuru rw’Ubucuruzi, Urukiko rurasanga nta shingiro bifite kuko, nk’uko byagaragajwe haruguru, Urukiko Rukuru rw’Ubucuruzi rwemeje ko ibyo Club House la Palisse Hotels Ltd yajuririye ntaho bihuriye n’ibiteganywa mu ngingo ya 47 y’Itegeko N° 005/2008 ryo ku wa 14/02/2008 ryerekeye ubukemurampaka n’ubwunzi mu bibazo by’ubucuruzi kandi atari byo, kuko nk’uko byasobanuwe haruguru icyemezo cy’ubukemurampaka kinyuranyije n’amategeko ndemyagihugu y’u Rwanda, rero Urukiko Rukuru rw’Ubucuruzi rwagombaga kukivanaho, kuba rutarakivanyeho byarenganyije Club House la Palisse Hotels Ltd. [39] Urukiko rushingiye ku ngingo z’amategeko no kubisobanuro byatanzwe haruguru, rurasanga icyemezo cy’umukemurampaka KIAC Arbitration N° 2020/172 cyo ku wa 16/05/2022 cyarafashwe mu buryo bunyuranyije n’amategeko kikaba kigomba kuvaho, kuko byibukijwe haruguru kuko Club House la Palisse Hotels Ltd yamenyeshe umukemurampaka ko habayeho ubwumvikane ariko bubirengaho busuzuma ikibazo cyabo nyamara bwaragamboga guhagarikira aho. Urukiko rurasanga rero urubanza RCOM 00034/2022/HCC rwaciwe n’Urukiko Rukuru rw’Ubucuruzi ku wa 28/10/2022, rwemeje ko icyo cyemezo b’ubukemurampaka kigumaho, rurimo akarengane, bityo rukaba rero ruhindutse mu ngingo zarwo zose. 2. Kumenya niba indishyi, amafaranga y’ikurikiranarubanza n’igihembo cya Avoka bisabwa muri uru rubanza bifite ishingiro [40] Abahagarariye Club House la Palisse Hotels Ltd bashingiye ku biteganywa mu ngingo ya 111 y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi basaba Urukiko rw’Ubujurire ko mu gihe rwakwemeza ko Club House la Palisse Hotels Ltd yarenganijwe, rwazayigenera amafaranga yo gukurikirana urubanza, igihembo cya Avoka wayiburaniye, n’indishyi z’akababaro ruzishingiye ku ngingo ya 81 y’itegeko rigenga amasezerano yavuzwe haruguru. Bagasobanura ko isaba 6.000.000 Frw y’igihembo cy’Abavoka babiri, 50.000.000 Frw y’indishyi z’akababaro, 5.000.000 Frw y’indishyi zo gusiragizwa mu manza, na 16.000.000 Frw yishyuwe muri KIAC. [41] Abahagarariye Mukeramirimo Construction Ltd bashingiye ku bitagnywa n’ingingo ya 111 igika cya 1, y’Itegeko n°22/2018 ryavuzwe haruguru no ku ngingo ya 26 y’Amabwiriza Nº 01/2014 agenga ibihembo mbonera by’Abavoka basaba Urukiko rw’Ubujurire gutegeka Club House la Palisse Hotels Ltd guha Mukeramirimo Construction Ltd 2.000.000 Frw y’ikurikiranarubanza n’igihembo cya Avoka. [42] Abahagarariye Club House la Palisse Hotels Ltd biregura ku mafaranga asabwa Mukeramirimo Construction Ltd bavuga ko nta shingiro afite, kuko Club House la Palisse Hotels Ltd yasubirishije urubanza ku mpamvu z’akarengane kakemerwa, ko nta mategeko yishe ku buryo yabicirirwa indishyi.

## Page 12

UKO URUKIKO RUBIBONA [43] Ku birebana n‘indishyi n’amafaranga yishyuwe muri KIAC, Club House la Palisse Hotels Ltd isaba, Urukiko rurasanga bitasuzumirwa muri uru rubanza kuko bitaregewe mu rubanza rusubirwamo ku mpamvu z’akarengane. [44] Naho ku birebana n’amafaranga y’ibyagiye ku rubanza, ingingo ya 111 y’Itegeko N° 22/2018 ryo ku wa 28/04/2018 ryerekeye imiburanishirize y’imanza mbonezamubano, iz’ubucuruzi, iz’umurimo n’iz’ubutegetsi iteganya ibikurikira: “Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. [45] Urukiko rurasanga amafaranga y’igihembo cya Avoka, Club House la Palisse Hotels Ltd isaba muri uru rubanza afite ishingiro, kuko ikirego cyayo gifite ishingiro, ariko ayo isaba ni menshi hakurikijwe ibyakozwe mu rubanza, mu bushishozi bwarwo ruyigeneye 500.000 Frw y’igihembo cya Avoka na 200.000 Frw y‘ikurikiranarubanza. Naho ayo Mukeramirimo Construction Ltd isaba nta shingiro afite kuko bigaragaye ko ibyo yireguza nta shingiro bifite. III. ICYEMEZO CY’URUKIKO [46] Rwemeje ko ikirego cyo gusubirishamo urubanza ku mpamvu z’akarengane cyatanzwe na Club House la Palisse Hotels Ltd gifite ishingiro. [47] Rwemeje ko urubanza RCOM 00034/2022/HCC rwaciwe n’Urukiko Rukuru rw’Ubucuruzi ku wa 28/10/2022, ruhindutse mu ngingo zarwo zose. [48] Rwemeje ko icyemezo cy’Ubukemurampaka KIAC Arbitration N° 2020/172 kivanweho. [49] Rutegetse Mukeramirimo Construction Ltd kwishyura Club House la Palisse Hotels Ltd 500.000 Frw y’igihembo cya Avoka na 200.000 Frw y’ikurikiranarubanza.