ELEGANCIA HOTEL Ltd vs. DEVELOPMENT BANK OF RWANDA Plc (BRD Plc) N’UNDI

# ELEGANCIA HOTEL Ltd vs. DEVELOPMENT BANK OF RWANDA Plc (BRD Plc) N’UNDI

- Source: Amategeko - Section: Decisions (Judgements) - Date: 2022-01-21 - Case/document no.: RCOMAA00045/2021/CA - Collection: Court of Appeal

## Text

## Page 1

ELEGANCIA HOTEL Ltd vs. DEVELOPMENT BANK OF RWANDA Plc (BRD Plc) N’UNDI [Rwanda URUKIKO RW’UBUJURIRE – RCOMAA00045/2021/CA (Ngagi, P.J.,) 21 Mutarama 2022] Amategeko agenga imiburanishirize y’imanza – Kureka urubanza – Ukureka urubanza ni uburenganzira bw’uwareze, aho urubanza ruba rugeze hose, ariko ibyo byemezwa n’urukiko iyo bikozwe mu buryo bwemewe n’amategeko – Itegeko N 22/2018 ryo ku wa 29/04/2018 ryerekeye ⁰ imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibukurikira, ingingo ya 123. Incamake y’ikibazo : Sosiyete Elegancia Hotel Ltd yatanze ikirego mu Rukiko rw’Ubucuruzi isaba gutangiza izahura ry’ubucuruzi ryayo no gushyiraho umucungamutungo w’iryo zahura, maze itanga n’impamvu ishingiraho ubusabe bwayo. BRD Plc yagobotse ku bushake, ivuga ko sosiyete Elegancia yari iyifitiye umwenda, bityo ko amategeko ayemerera kugira icyo ivuga kuri iryo zahura, hagamijwe kurengera inyungu zayo zo kwishyurwa umwenda iyifitiye mu rwego rwo gukumira igihombo byazayitera, isaba Urukiko kuzagena uburyo amakuru ajyanye n’imigendekere y’igihombo yazajya iyamenyeshwa. Urukiko rw’Ubucuruzi rwemeje ko ikirego cyatanzwe na Elegancia Hotel Ltd gifite ishingiro, maze rwemeza kandi ko ukugoboka kwa BRD Plc gufite ishingiro kuri bimwe, rwemeza nanone Me Abayo Jean Claude nk’umucungamutungo wayo w'agateganyo ushinzwe kuyifasha kuzahura ubukungu bwayo. Elegancia Hotel Ltd ntiyishimiye icyemezo cy’urukiko maze ikijuririra mu Rukiko Rukuru rw’Ubucuruzi igaragaza n’impamvu zayo z’ubujurire. Elegancia Hotel Ltd in Liquidation nayo yagobotse mu rubanza ku bushake ivuga ko Elegancia Hotel Ltd mu kujurira mu Rukiko rw’Ubucuruzi, yari yarengeje iminsi y'ubujurire iteganywa n’itegeko. BRD Plc mbere yo kwiregura yatanze inzitizi ivuga ko ubujurire bwa Elegancia Hotel Ltd butagomba kwakirwa ivuga ko nta bubasha ifite, kandi ko itubahirije ibihe byo kujurira biteganywa n’amategeko. Urukiko Rukuru rw’Ubucuruzi rwaciye urubanza, maze rwemeza ko inzitizi yatanzwe na BRD Plc n’iyatanzwe na Elegancia Hotel Ltd in Liquidation, nta shingiro zifite, rwemeza kandi ko ubujurire bwatanzwe na Elegancia Hotel Ltd nta shingiro bufite, bityo ko imikirize y’urubanza rwaciwe n’Urukiko rw’Ubucuruzi idahindutse. Elegancia Hotel Ltd yajuririye na none Urukiko rw’Ubujurire, ariko ababuranyi bombi bakoranye inama mbere yaho, bagira ibyo bumvikanaaho, maze uhagarariye Elegancia Hotel Ltd amenyesha urukiko ko iretse urubanza, uruhande baburanaga narwo rurabyemera, bagaragaza inyandiko yo kureka urubanza yashyizweho umukono n’impande zombi.

## Page 2

Incamake y’icyemezo : Ukureka urubanza ni uburenganzira bw’uwareze, aho urubanza ruba rugeze hose, ariko ibyo byemezwa n’urukiko iyo bikozwe mu buryo bwemewe n’amategeko. Kureka urubanza bifite ishingiro; Amagarama y’urubanza ahwanye n’ibyarukozwemo. Amategeko yashingiweho: Itegeko N 22/2018 ryo ku wa 29/04/2018 ryerekeye imiburanishirize y’imanza ⁰ z’imbonezamubano, iz’ubucuruzi, iz’umurimo n’iz’ubutegetsi iteganya ibukurikira, ingingo ya 123. Nta manza zifashishijwe. Urubanza I. IMITERERE Y’URUBANZA [1] Uru rubanza rwatangiriye mu Rukiko rw’Ubucuruzi, Elegancia Hotel Ltd isaba gutangiza izahura ry’ubucuruzi ryayo no gushyiraho umucungamutungo w’iryo zahura, itanga n’impamvu ishingiraho ubusabe bwayo. [2] BRD Plc yagobotse muri urwo rubanza ku bushake, ivuga ko amategeko ayemerera kugira icyo ivuga kuri iryo zahura, hagamijwe kurengera inyungu zayo zo kwishyurwa umwenda Elegancia Hotel Ltd iyifitiye kugira ngo hubahirizwe amasezerano impande zombi zagiranye, mu rwego rwo gukumira igihombo byazayitera. Ko kandi mbere yo gutanga ikirego isaba Urukiko kwemeza ko habaho izahura, yagombaga kubanza kwerekwa gahunda y'izahura ikagira icyo iyivugaho. Isoza isaba Urukiko kuzagena uburyo amakuru ajyanye n’imigendekere y’igihombo yazajya iyamenyeshwa. [3] Mu rubanza RCOM01155/2018/TC rwaciwe n’Urukiko rw’Ubucuruzi ku wa 13/12/2018, urwo Rukiko rwemeje ko ikirego cyatanzwe na Elegancia Hotel Ltd isaba itangizwa ry'uburyo bw'ikurikirana bwerekeye igihombo muri iyo sosiyete gifite ishingiro, ko kugoboka kwa BRD Plc gufite ishingiro kuri bimwe, ko Me Mutabazi Abayo Jean Claude aba Umucungamutungo w'agateganyo wa Elegancia Hotel Ltd, inshingano ye nyamukuru ikaba ari ugufasha iyo sosiyete kuzahura ubukungu bwayo, igakomeza gukora (aider la société à pouvoir se redresser). [4] Urwo Rukiko rwemeje kandi ko kuri buri raporo Umucungamutungo azajya ashyikiriza Urukiko agomba kujya agenera kopi BRD Plc iberewemo umwenda, ko Me Mutabazi Abayo Jean Claude azahembwa 700.000Frw ya buri kwezi akubiyemo igihembo n'amafaranga y'urugendo kubera akazi ashinzwe n'Urukiko ko gucunga umutungo no kuzahura ibikorwa by'ubucuruzi bwa Elegancia Hotel Ltd, ko agomba no gusubizwa amafaranga ye bwite yakoresheje mu gihe yuzuza inshingano yategetswe yo kuzahura sosiyete iyo ayagaragarije ibimenyetso byanditse, ko umucungamutungo w'agateganyo azatangira imirimo ye guhera tariki ya 20/12/2018 saa mbiri za mu gitondo (8:30), akarangiza bitarenze ku wa 19/06/2019. Ko kandi

## Page 3

ibindi byasobanuwe muri uru rubanza bitagaragara mu cyemezo, Umucungamutungo agomba kubyubahiriza ashingiye ku itegeko. [5] Mu gukurikirana imikorere y’iryo zahura ry’ubukungu bwa Elegancia Hotel Ltd, ku wa 29/03/2021, Urukiko rw’Ubucuruzi rwaje gufata icyemezo mu rubanza RCOM01155/2018/TC cyo gutangiza ikurikirana ry’igihombo muri Elegancia Hotel Ltd kubera ko yari itagishoboye kwishyura imyenda yagejeje igihe, idafite n’ubushobozi bwo kuzayishyura ku itariki yagenwe. [6] Elegancia Hotel Ltd ntiyishimiye icyo cyemezo, ikijuririra mu Rukiko Rukuru rw’Ubucuruzi igaragaza n’impamvu zayo z’ubujurire. [7] Elegancia Hotel Ltd in Liquidation yagobotse mu rubanza ku bushake kuri urwo rwego rw’ubujurire ivuga ko niba Elegancia Hotel Ltd yarajuririye urubanza RCOM01155/2018/TC rwaciwe ku wa 13/12/2018, yarengeje iminsi y'ubujurire. BRD Plc mbere yo kwiregura yatanze inzitizi ivuga ko ubujurire bwa Elegancia Hotel Ltd butagomba kwakirwa kubera ko nta bubasha ifite, ko kandi Elegancia Hotel Ltd itubahirije ibihe byo kujurira biteganywa n’amategeko. [8] Ku wa 27/07/2021, Urukiko Rukuru rw’Ubucuruzi rwaciye urubanza RCOMA00326/2021/HCC, rwemeza ko inzitizi yatanzwe na BRD Plc n’iyatanzwe na Elegancia Hotel Ltd in Liquidation, zo kutakira ubujurire bwa Elegancia Hotel Ltd kubera iburabubasha bwayo, kimwe n’iyo kutakira ubujurire bwatanzwe na Elegancia HoteL Ltd kubera kujurira imburagihe nta shingiro zifite, ko ubujurire bwatanzwe na Elegancia Hotel Ltd nta shingiro bufite, ko imikirize y’urubanza RCOM 01155/2018/TC rwaciwe n’Urukiko rw’Ubucuruzi ku wa 29/03/2021 idahindutse. Rutegeka Elegancia Hotel Ltd guha BRD Plc 200.000 Frw y’ikurikiranarubanza na 1.500.000 Frw y’igihembo cya Abavoka. Yose hamwe akaba 1.700.000 Frw. [9] Elegancia Hotel Ltd yajuririye na none uru Rukiko, ubujurire bwayo bwandikwa kuri RCOMAA 00045/2021/CA. [10] Urubanza rwahamagajwe ku wa 10/01/2021, Elegancia Hotel Ltd ihagarariwe n’Umuyobozi wayo Uruvuzundi Aloys, ariko atunganiwe kubera ko Me Murutasibe Joseph yanditse muri IECMS agaragaza ko arwaye, BRD Plc ititabye naho Elegancia Hotel Ltd in Liquidation ihagarariwe n’uyihagarariye Me Mitsindo Tom, kuri uwo munsi iburanisha ntiryabaye kubera impamvu yavuzwe haruguru, ryimurirwa ku wa 17/01/2022, uwo munsi urubanza ruburanishwa Elegancia Hotel Ltd ihagarariwe nka mbere, yunganiwe na Me Murutasibe Joseph, BRD Plc ihagarariwe na Me Uwamahoro Marie Grâce afatanyije na Me Rugamba Théoneste naho Elegancia Hotel Ltd in Liquidation idahagarariwe ariko Me Mitsindo Tom uyihagarariye yarasinyiye itariki, urubanza ruburanishwa idahagarariwe. II.IKIBAZO KIGIZE URUBANZA N’ISESENGURA RYACYO Kumenya niba Elegancia Hotel Ltd yakwemererwa kureka urubanza RCOMAA00045/2021/CA

## Page 4

[11] Uruvuzundi Aloys hamwe na Me Murutasibe Joseph umwunganira bavuga ko Elegancia Hotel Ltd iretse urubanza nk’uko babyemeranyijwe ho mu nama yo ku wa 14/01/2022, ko n’inyandiko bakoze bayishyize muri dosiye. [12] Me Uwamahoro Marie Grâce na Me Rugamba Théoneste bavuga ko BRD Plc yemera ko Elegancia Hotel Ltd ireka urubanza nk’uko babyumvikanye mu nama yo ku wa 14/01/2022. UKO URUKIKO RUBIBONA [13] Ingingo ya 123 y’Itegeko N 22/2018 ryo ku wa 29/04/2018 ryerekeye imiburanishirize ⁰ y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibukurikira: “Kureka urubanza ni uburenganzira umuburanyi afite bwo kuvuga ko aretse urubanza yari yaregeye, uwo yaregaga akabyemera. Kureka urubanza bishobora gukorwa no kwemerwa aho urubanza rwaba rugeze hose bikozwe mu nyandiko iriho umukono w’umuburanyi ubwe cyangwa w’umwunganira kandi bikamenyeshwa uwo baburana. Bishobora kandi kuvugirwa mu nama ntegurarubanza cyangwa mu iburanisha.” [14] Dosiye y’urubanza igaragaza inyandiko yo kureka urubanza RCOMAA00045/2021/CA yo ku wa 14/01/2022, yashyizweho umukono na Elegancia Hotel Ltd, Elegancia Hotel Ltd in Liquidation hamwe na BRD Plc. Muri iyo nyandiko bemeranyije ko Elegancia Hotel Ltd ireka urubanza RCOMAA00045/2021/CA yari yaratanze mu Rukiko rw’Ubujurire bitewe n’ibiganiro barimo byo kugurisha iyo hoteli no kwishyura imyenda abo iyibereyemo, ko n’abaregwa aribo BRD Plc na Elegancia Hotel Ltd in Liquidation babyemeye. [15] Hashingiwe ku biteganywa n’ingingo ya 123 y’Itegeko No 22/2018 ryo ku wa 29/04/2018 yibukijwe haruguru, Urukiko rurasanga nta cyabuza Elegancia Hotel Ltd kwemererwa ukureka urubanza, kuko abo baburana babyemera. III. ICYEMEZO CY’URUKIKO [16] Rwemeye ukureka urubanza RCOMAA00045/2021/CA byasabwe na Elegancia Hotel Ltd. [17] Ruvuze ko ingwate y’amagarama yatanzwe na Elegancia Hotel Ltd ihwanye n’ibyakozwe mu rubanza.